RUSİYA AVROPADA ADİ SİLAHLI QÜVVƏLƏR HAQQINDA MÜQAVİLƏDƏ İŞTİRAKINI DAYANDIRMIŞDIR
AZƏRTAC-ın xüsusi müxbiri xəbər verir ki, Rusiya Dövlət Duması Prezident Vladimir Putinin təşəbbüsünü dəstəkləyərək, “Rusiya Federasiyasında “Avropada adi silahlı qüvvələr haqqında müqavilə”nin (AASQM) fəaliyyətinin dayandırılması haqqında“ qanun layihəsini bəyənmişdir. Müvafiq qanun noyabrın 7-də 418 deputatın səsi ilə yekdilliklə qəbul olunmuşdur.
Qanunda AASQM-da iştiraka moratorium qoymaqla yanaşı, Rusiya Federasiyasının Prezidentinə müqavilənin fəaliyyətinin bərpası haqqında qərar qəbul etmək səlahiyyəti verilməsi nəzərdə tutulur.
RF Silahlı Qüvvələri Baş Qərargahının rəisi, ordu generalı Y.Baluyevski bildirmişdir ki, Rusiya müqaviləyə münasibətdə atacağı addımlar barədə Qərbə dəfələrlə xəbərdarlıq etmişdir. AASQM pozulsa da, bu, Rusiyanın təqsiri və onun üçün əvəzedilməz itki olmayacaqdır. Öz təhlükəsizliyini və milli mənafelərini təmin etmək üçün Rusiyanın kifayət qədər gücü, vəsaiti və üsulu vardır.
Dövlət Dumasında çıxış edən Y.Baluyevski onu da bildirmişdir ki, AASQM ABŞ-ı və NATO-nu razı salır və alyansın Şərqə doğru genişlənməsinə imkan verir. Qərbdəki tərəfdaşlar Rusiyanın hərbi təhlükəsizlik və silahlara nəzarət sahəsində, o cümlədən bu müqaviləyə dair öz beynəlxalq öhdəliklərinə riayət edilməsi ilə bağlı prinsipial mövqeyindən ona qarşı təzyiq vasitəsi kimi istifadə etməyə çalışırlar.
Xarici işlər nazirinin müavini S.Kislyak isə çıxışında demişdir ki, Rusiyanın AASQM-də iştirakının dayandırılması haqqında qanun layihəsinin qəbulu siyasi baxımdan düzgün, fiziki baxımdan isə zəruridir, çünki indiki halda müqavilə siyasi reallıqlara cavab vermir və Rusiyanın hərbi məqsədlərinə ziddir.
Rusiyanın 1990-cı ildə imzalanmış AASQM iştirakçılarına qarşı əsas iddiası NATO-ya üzv ölkələrin sənədi ratifikasiya etməməsidir. Bəzi şərhçilərin fikrincə, Rusiyanın AASQM-də iştirakını dayandırması regionda hərbi qüvvələrin nisbətinə ciddi təsir göstərib, tarazlığın pozulmasına gətirib çıxaracaqdır.
Bölmənin digər xəbərləri
