Rusiyanın yanğın baş vermiş sualtı gəmisi tədqiqatlarla yanaşı, kəşfiyyat işləri də aparır
Moskva, 3 iyul, AZƏRTAC
Yanğın nəticəsində 14 dənizçinin həlak olduğu Rusiya sualtı gəmisi tədqiqat və xilasetmə əməliyyatları ilə yanaşı, kəşfiyyat işləri də aparır.
AZƏRTAC-ın xəbər verdiyi kimi, iyulun 1-də Rusiya Hərbi Dəniz Donanmasına məxsus dərin sularda üzən atom sualtı gəmisində yanğın nəticəsində 14 dənizçi həlak olub. Hadisə ilə əlaqədar Rusiya Prezidenti Vladimir Putin “Reki Rossii” forumunda iştirakdan imtina edərək Kremlə qayıdıb və müdafiə naziri Sergey Şoyqu ilə görüşüb. V.Putin dənizçilərin ailələrinə başsağlığı verərək bildirib ki, həlak olanlardan yeddi nəfəri birinci dərəcəli kapitan, iki nəfəri isə Rusiya Qəhrəmanı olub.
Sualtı gəmidə yanğının başvermə səbəbləri hələlik məlum deyil. Peşəkar dairələrdə “Loşarik” adlanan “AC-12” gəmisi Rusiyada istehsal olunmuş qabaqcıl məxfi sualtı aparatlardan biridir. 1995-ci ildə istehsal olunmuş gəminin heyəti 25 nəfərdən ibarət olub. Sualtı gəmidə silah olmasa da o, sualtı minalar quraşdıra, kommunikasiyaları zədələyə bilir. Hazırda aparat Murmansk vilayətinin Severomork şəhərinə gətirilib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
