ŞAİR AĞA LAÇINLININ ANIM GECƏSİ KEÇİRİLMİŞDİR
Bakı, 21 may (AZƏRTAC). Binə qəsəbəsində şəhid Pənah Məmmədov adına 46 nömrəli Laçın rayon orta məktəbində ziyalıların, ictimaiyyət nümayəndələrinin iştirakı ilə mərhum şair, filoloq-alim Ağa Laçınlının anadan olmasının 70 illiyinə həsr olunmuş anım geçəsi keçirilmişdir.
Məktəbin direktoru Baxşeyiş Ağayev, şairin qardaşı Əli Əliyev, şair Tofiq Abdin, Azərbaycan Dövlət Pedaqoji Universitetinin dosenti Museyib İlyasov, Azərbaycan Müəllimlər İnstitutunun dosenti Hidayət Tağıyev və digərləri çıxış edərək Ağa Laçınlının həyat və yaradıcılığından danışmışlar.
Bildirilmişdir ki, Ağa Laçınlı 1940-cı ildə Laçın rayonunda anadan olmuşdur. Azərbaycan Dövlət Universitetini və Maksim Qorki adına Moskva Ədəbiyyat İnstitutunun poeziya fakültəsini bitirmişdir. “Ədəbiyyat və incəsənət” qəzetinin şeir şöbəsində çalışmış, Yazıçılar Birliyinin “Natəvan” klubunun müdiri olmuşdur. Ədəbi fəaliyyətlə yanaşı, Bakı Dövlət Universitetində dərs demiş, burada gənc poeziyasevərlər dərnəyi yaratmışdır.
İlk şeirlər kitabı “Ümid” 1966-cı ildə nəşr olunmuşdur. Sonralar “Sakitik”, “Sirli-soraqlı dağlar”, “Aşırımlar qarşısında”, “Meşə nəğməsi” kimi 15 kitabı nəşr olunmuşdur. Şeirləri müxtəlif xarici dillərə tərcümə olunmuş, özü xarici dillərdən dilimizə tərcümələr etmişdir. 1987-ci ildə Moskvada “Qorod tainstvenniy”adlı şeirlər kitabı nəşr edilmişdir. Ağa Laçınlı 2007-ci il noyabrın 25-də vəfat etmişdir.
Tədbirdə Ağa Laçınlının xatirəsinin əbədiləşdirilməsi üçün təkliflər də irəli sürülmüşdür.
Şairin oğlu, yazıçı-publisist Fəxri Uğurlu tədbirin təşkilatçılarına və iştirakçılarına minnətdarlığını bildirmişdir.
Bölmənin digər xəbərləri
