ŞAİRİN XATİRƏSİNƏ HƏSR OLUNMUŞ TƏDBİR KEÇİRİLMİŞDİR
Bakı, 20 oktyabr (AZƏRTAC). Dövlət Muğam Teatrında şair Malik Fərruxun xatirəsinə həsr olunmuş tədbir keçirilmişdir.
Tanınmış şairin həyat və yaradıcılığından ətraflı söz açılan xatirə günündə vurğulanmışdır ki, həm də publisist və jurnalist kimi geniş fəaliyyət göstərmiş Malik Fərrux həyatı sevən insan olmuşdur. Laçında dünyaya göz açan şairin yaradıcılığında o dağların vüqarı, təmizliyi, ucalığı məhəbbətlə tərənnüm edilmişdir. Amma o, ömrünün son illərində şeirlərində yaşatdığı dağlara həsrət qalmışdı.
Oxucuları tərəfindən həmişə məhəbbətlə xatırlanacaq şair özündən sonra bizə «Pəncərədən qızlar baxar», «Bir payız günü» şeir kitablarını, mahnı bəstələnmiş yüzə yaxın şeirini yadigar qoymuşdur. Çıxışlarda belə bir əminlik ifadə olunmuşdur ki, 1998-ci ilin şaxtalı qışında, 50 yaşına çatmamış gözlərini əbədi yuman Malik Fərrux onun sözlərinə yazılmış «Qara gözlər», «Sarı güllər», «Sən də tufanla oynama», «Polismen» və başqa dillər əzbəri mahnıları ilə ürəklərdə həmişə yaşayacaqdır.
Bölmənin digər xəbərləri
