SİYASƏT
Şanlı Zəfər xalq-iqtidar birliyi, güclü ordu və dünya azərbaycanlılarının həmrəyliyi nəticəsində qazanıldı
Bakı, 30 dekabr, AZƏRTAC
2020-ci ildə Azərbaycan üçün ən yaddaqalan hadisələrdən biri xalqımızın şanlı tarixinə qızıl hərflərlə yazılan möhtəşəm Qələbəni çox böyük coşqu ilə yaşamağımızdır. Müzəffər Ordumuz böyük qəhrəmanlıq göstərərək qısa müddətdə düşməni ağır məğlubiyyətə uğratdı və ölkəmizin ərazi bütövlüyünü bərpa etdi. Milli dövlətçilik tariximizdə və xalqımızın yaddaşında əbədi yaşayacaq şanlı Zəfər xalq-iqtidar birliyi, güclü ordu və ona rəhbərlik edən Müzəffər Ali Baş Komandan, Prezident İlham Əliyevin gərgin siyasi-diplomatik fəaliyyəti, eyni zamanda, dünya azərbaycanlılarının həmrəyliyi nəticəsində qazanıldı.
Bunu AZƏRTAC-a açıqlamasında Milli Məclisin deputatı Məzahir Əfəndiyev bildirib.
Deputat deyib ki, Vətən müharibəsi zamanı xaricdə yaşayan soydaşlarımızın düşmənin təxribatlarına qarşı cəsarətli etirazları, Azərbaycan həqiqətlərinin beynəlxalq ictimaiyyətə çatdırılması istiqamətində göstərdikləri fədakarlıqlar da böyük Qələbəmizə layiqli töhfə olub.
Bu gün qalib xalqımız Dünya Azərbaycanlılarının Həmrəyliyi Gününü ilk dəfə olaraq ölkəmizin ərazi bütövlüyü şəraitində qeyd edir. Məhz ulu öndər Heydər Əliyev 1991-ci il dekabrın 16-da dünya azərbaycanlılarının birliyinin vacibliyini nəzərə alaraq dekabrın 31-ni Dünya Azərbaycanlılarının Həmrəyliyi Günü elan edib.
Həmrəylik Günü Vətənə məhəbbət, milli-mənəvi dəyərlərimizə hörmət, azərbaycançılıq ideologiyası ətrafında birləşmək kimi müqəddəs hissləri özündə ehtiva edir.
Ümummilli Lider erməni təcavüzünün, Qarabağ həqiqətlərinin dünya ictimaiyyətinə çatdırılmasının xaricdə yaşayan hər bir azərbaycanlının əsas vəzifəsi olduğunu bildirərək, ilk dəfə 2001-ci ilin noyabrında ölkəmizin ictimai-siyasi həyatında yeni bir hərəkat, dövlət siyasətinin yeni bir istiqaməti olan Dünya Azərbaycanlılarının I Qurultayının keçirilməsinə nail oldu.
Sonrakı illərdə Ulu Öndərin bu siyasi kursu Prezident İlham Əliyev tərəfindən ardıcıl olaraq uğurla davam etdirildi. Dövlətimizin başçısının “Mən dünyada yaşayan hər bir azərbaycanlının prezidentiyəm” sözləri həmrəyliyimizi daha da möhkəmləndirdi.
“Məhz Vətən müharibəsindəki möhtəşəm Qələbəmiz nəticəsində xalqımızın, eyni zamanda, xaricdə yaşayan həmvətənlərimizin birlik və həmrəyliyi daha da möhkəmləndi, onların daha mütəşəkkil formada təşkilatlanması təmin edildi”, - deyən M. Əfəndiyev bildirib ki, bu gün dünya azərbaycanlıları yaşadıqları ölkələrin sosial-iqtisadi, ictimai-siyasi və mədəni həyatında daha fəal rol oynamaqla respublikamızla qarşılıqlı əlaqələrin genişlənməsinə böyük töhfə verirlər.
Deputat bildirib ki, 30 il müddətində işğal altında olan torpaqlarımız düşmən tərəfindən vəhşicəsinə dağıdılıb, bütün infrastruktur məhv edilib. Buna baxmayaraq, Prezident İlham Əliyev vurğuladığı kimi, “Ermənistanın işğalı və vəhşiliyi nəticəsində başdan-başa dağıdılmış doğma Qarabağımızı əminəm ki, biz ən qısa zamanda əsl cənnətə çevirəcəyik”.