SAYİMƏ TOPTAN UŞAQ EVİNDƏ YARADILAN ŞƏRAİTDƏN RAZI QALMIŞDIR
AZƏRTAC xəbər verir ki, Türkiyə Böyük Millət Məclisi sədrinin xanımı Sayimə Toptan iyunun 19-da Nizami rayonunda yerləşən 1 nömrəli uşaq evində olmuşdur.
Burada xanım Sayimə Toptanı Nizami Rayon İcra Hakimiyyətinin başçısı Mehbalı Əliyev, uşaq evinin direktoru Nərminə Zöhrabova səmimiyyətlə qarşıladılar.
N.Zöhrabova qonağa məlumat verdi ki, Heydər Əliyev Fondu tərəfindən əsaslı təmir olunan 1 nömrəli uşaq evinin 120 sakini vardır. 3 yaşından 20 yaşınadək uşaq və yeniyetmənin bütün tələbatlarını ödəyən, yüksək zövqlə qurulan müəssisə müasir standartlara cavab verir. Bütün bunlar Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü və dəstəyi sayəsində mümkün olmuşdur. Müəssisədə bədii gimnastika, rəqs, rəssamlıq, xalçaçılıq və digər dərnəklər fəaliyyət göstərir.
Xanım Sayimə Toptan otaqları gəzdi, uşaqların əl işlərinə baxdı, onların iştirakı ilə ədəbi-bədii kompozisiya göstərildi. Milli geyimli oğlan və qızlar ifaçılıq məharətlərini nümayiş etdirdilər.
Balacalarla ünsiyyətdən məmnun qalan qonaq dedi ki, burada uşaqlar üçün yaradılmış şərait məni çox sevindirir.
Sonra qarşılıqlı xatirə hədiyyələri təqdim edildi.
Türkiyənin Azərbaycandakı səfiri Hulusi Kılıçın xanımı Günay Kılıç da qonaqla birgə olmuşdur.
######
Bölmənin digər xəbərləri
