CAVAB: Qeyd etmək istəyirəm ki, bunu qəzet adlandırmaq belə istəmirəm bir kağız parçasında yazan adamlar əllərindəki qələmləri bir bıçaq, tapanca kimi istifadə edir. Ziyalılara, alimlərə, diplomatlara, hər kəsə hucum çəkməyi, böhtan atmağı peşə seçiblər. Onların səviyyəsinə düşmək, onlarla polemikaya girmək istəmirəm. Ancaq hər yazılarında nə qədər səviyyəsiz, məlumatsız olduqları əyani şəkildə ortaya çıxır. Gülhanə Hərbi Tibb Akademiyası nəhəng bir klinikadır. Oraya minlərlə adam müraciət edir, müalicə, müayinə görür. On minlərlə adam buraya rahat girib-çıxır. Xəstəlikləri ilə əlaqədar müraciət edir, dost və qohumlarının ziyarətinə gəlir. Mən Azərbaycan Respublikasının fövqəladə və səlahiyyətli səfiri kimi ölkə Prezidentinin iqamətgahı, Baş nazirlik, Silahlı qüvvələrin baş gərargahını rahatlıqla ziyarət edirəm. Heç kim buna mane olmur və ola da bilməz. Bütün bu iddihamlar yalandır, əsilsizdir.

SUAL: Məmməd müəllim müxalifət mətbuatımızın səhifələrində günlərdir Sizin cənab prezidentin görüşləri ilə əlaqədar söylədiyiniz sözlər şübhə ilə qarşılanır. Belə görüş baş verdikdə isə yəni iyulun 30-da Türkiyə Resublikasının prezidenti Əhməd Nəcdət Sezər Azərbaycan Respublikasının Prezidenti Heydər Əliyevi ziyarət edəndə, Sizin bu görüşdən xəbəriniz olmadığı yazıldı.

Cənab Prezidentin Gülhanədən çıxdığı ancaq yarı yoldan geri qayıtdığı irəli sürüldü. Bu iddialara münasibətiniz?

CAVAB: Birincisi bu yalanlarla, böhtanlarla bunları nə qədər savadsız, dövlət işlərindən, dövlətlər arası protokol normalarından xəbərsiz olduqları bir daha təsdiqlənir. Belə bir şey ola bilərmi? Hörmətli Əhməd Necdət Sezər prezidentimizi ziyarət edəcək, görüşəcək, fikir mübadiləsi aparacaq və mənim - bu ölkədəki səfirin bundan xəbəri olmayacaq? Gülünc bir iddia. Hamısı da yalan! Bəli iyulun 30-da Türkiyə Respublikasının Preidenti Əhməd Necdət Sezər Gülhanə Hərbi Tibb Akademiyasına gəldi: Protokol qaydalarına görə onu qapıda qarşıladım. Möhtərəm Prezidentimiz ilə görüşdü. Görüşdən sonra yüksək qonağı yenə də qapıya qədər ötürdüm. Hörmətli Əhməd Nəcdət Sezər Prezidentimizin uğurlu müayinə və müalicəsi ilə əlaqədar məmnuniyyətini bir daha dilə gətirdi. Bu bir protokol, etik, mədəni dəyərlərdən çox uzaq qalanlar bunları anlamaz. Ortaya da belə çirkin yalanlar çıxar. İkinci məsələyə gəlincə, bu da tam yalandır. Prezidentimiz möhtərəm Heydər Əliyev Gülhanə Hərbi Tibb Akademiyasından ayrılmamışdır. Bu barədə yazılanlar da tam bir fantaziyadır, xəyal məhsuludur. Qətiyyən belə bir hadisə olmamışdır. Mənbə olaraq “TRT” və “NTV” televiziya kanalları “Cümhuriyyət” qəzeti gətirilir. Yalandır!

Nə TRT-nin, nə də NTV-nin xəbərlər proqramlarında belə bir informasiya verilməmişdir. O ki qaldı “Cümhuriyyət” qəzetinə, çox vaxt bu adamlar təsadüfən və ya qəsdən Türkiyədəki qəzetlə Azərbaycandakı eyniadlı qəzeti “səhv salırlar”. Türkiyənin “Cümhuriyyət” qəzeti belə bir xəbər yazmayıbdır.

SUAL: Cənab səfir, Azərbaycanın müxalifət mətbuatı özlərinin Türkiyə rəhbərliyindəki və Gülhanədəki mənbələrindən söz açır, adı çəkilməyən bu mənbələrin doğru, Gülhanədəki həkimlərin və sizin yalan məlumat verdiyinizi bildirir. Bu, nə qədər həqiqətə uyğundur? Eyni zamanda, bu “mənbələrin” də xəbərlərində uyğunsuzluqlar var. Bir gün cənab Prezidentin səhhətinin ağır olduğu, o biri gün isə gizli görüşlər keçirdiyi vurğulanır.

CAVAB: Yenə deyirəm ki, cənab Prezidentin səhhəti normaldır. Müayinə və müalicə nəzərdə tutulmuş şəkildə davam edir.

Mən mətbuat konfransında da dedim. Bütün dünya cənab Prezidentin tərcümeyi-halına bələddir. Hamı bilir ki, möhtərəm Prezidentimiz 1987-ci ildə infarkt keçirib. 1999-cu ildə ürəyində cərrahiyyə əməliyyatı aparıldığı da sirr deyildir. Vaxtaşırı müayinədən keçməsi də bəllidir. Cənab Prezidentin səhhətində başqa heç bir problem yoxdur. Bunu hər kəs bilir. Təkrar-təkrar bunu söyləməyə ehtiyac varmı? 1999-cu ildən etibarən cənab Prezident Gülhanə Hərbi Tibb Akademiyasında professor, tibb elmləri doktoru, admiral Ertan Dəmirtaşın rəhbərliyi ilə həkimlər tərəfindən müayinə və müalicə olunur. Cənab Prezident də bu müayinədən, müalicədən, ona göstərilən diqqət və qayğıdan razıdır.

Müxalifət mətbuatı ziddiyyətlər içindədir. Gah deyirlər ki, cənab Prezidentin vəziyyəti ağırdır, reanimasiyadadır, sonra isə bunu təkzib edir və amerikalılarla məxfi danışıqlar apardığını yazırlar. Bütün bunlar məntiqə ziddir. Bu, həm də Azərbaycan müxalifətinin intellekt səviyyəsinin güzgüsüdür. Yalanları da əməlli-başlı qoşub düzəldə bilmirlər. Keçmişdə deyirdilər ki, yalanın qırx gün ömrü var. Bunların yalanının ömrü isə qırx saniyədir. Onların heç bir ciddi informasiya mənbələri də yoxdur. Çünki ən doğru, ən səlahiyyətli informasiya mənbəyi hörmətli Ertan Dəmirtaşdır. Mən onların fəaliyyətini media terroru kimi qiymətləndirirəm. Bununla əlaqədar mərhum İsmət İnönünün tarixi sözlərini sitat gətirmək istəyirəm. 1930-cu illərdə Türkiyədə siyasətçilər qəzetlərin yalan və böhtan kampaniyaları ilə qarşılaşmışdılar və bu da cəmiyyətdə siyasətin nüfuzdan düşməsinə, dövlətin zəifləməsinə gətirib çıxarmışdı. Bundan narahat olan İsmət İnönü demişdir: “Qardaşlar, əgər bir məmləkətdə namuslu insanlar namussuzlar qədər səbirli və cəsarətli olmasalar, o məmləkət batar”. Mən də təəccüblənirəm. Bu bir ovuc böhtançı, yalançı media terrorçularının niyə cavabı verilmir? Türkiyədəki “böyük qardaşları” demokratik yolla necə cəzalandırıldısa, bunlar da eyni demokratik yollarla cəzalandırılmalıdır. Görəsən, bizim hüquqçular niyə susurlar? Bunların böhtanlarındanmı çəkinirlər? Bunlar hər gün daha da azğınlaşırlar.

Hər peşənin etika normaları, əxlaq qaydaları vardır. Ona görə, bu şəxslərin jurnalist olmasına da şübhə ilə yanaşıram. Bunlar nə etika, nə mədəniyyət, nə də tərbiyə bilirlər. Bunlar media terrorçularıdır.

Dükanda sizə köhnə, xarab mal satanda şikayət edə bilərsiniz. Hüquqlarınız qorunacaq. Bizdə isə bir qrup adam böyük-kiçik bilmədən, insanları ləkələyir, böhtan atır və cəzasız qalır. Bu, düzgün deyildir. Bu qəzetlərin səhifələrində mən də təhqir olunuram. Bir vətəndaş kimi mənim müdafiə haqqım yoxdurmu? Bunlar mediada terror edir, cəmiyyəti anarxiyaya çağırırlar. Ziyalılarımızı, alimlərimizi, diplomatlarımızı, siyasi xadimlərimizi təhqir edirlər. Kimlərdir bunlar? Azərbaycan üçün nə ediblər? Vətənin müdafiəsi üçün könüllü olaraq orduyamı yazılıblar? Elmi ixtiralarımı var? Gələcək nəsillərə bir mədəni irs, əsərmi qoyublar? Kim olduqları, adları belə bəlli olmayan Rauf, Mehdi, Könül kimlərdir ki, ictimaiyyətə dərs verirlər? Hədə-qorxu gəlirlər? Xalq qarşısında nə xidmətləri vardır? Aşağı səviyyədə, yarı-yamalaq bilgiləri olan insanlardır. Mənə qarşı şəxsi təhqirlərə gəlincə isə, onlara cavabımı hüquq yolu ilə verəcəyəm.

SUAL: Türkiyədə Star kanalı şayiələrə istinadən bir xəbər verir. Ertəsi gün bizim bəzi qəzetlər bu telekanalı mənbə göstərərək onu təkrarlayır. Türkiyədəki məlum telekanal bu dəfə bizim mətbuatı mənbə kimi göstərir və bu proses davam edir. Star TV bağlandı. Hazırda mənbə kimi bir İnternet saytı göstərilir. Bu barədə məlumatınız varmı?

- CAVAB: Bu barədə də, bu oyunu aparanlar haqqında da ətraflı məlumatımız vardır. Adlar dəyişsə də, mətləb, məqsəd və oyunçular eynidir. Bir vaxt Azərbaycanda “Avrasiya” qəzeti çap olunurdu. Sahibi də bəllidir. Star telekanalında və ya “Star” qəzetində yayımlanmayan, yazılmayan cəfəngiyat internet saytında əksini tapır. Dedikləri “ciddi”, “mötəbər” mənbə də bunlardır. Dünənə qədər Azərbaycanda gəzib dolaşan, indi də Türkiyədə “mötəbər mənbə”yə çevrilən insanlardır. Jurnalistlik fəaliyyətləri də yalnız çirkab atmaqdan ibarətdir. Belə bir söz var: palçıq at ki, yapışmasa da, izi, ləkəsi qalsın. Bunların əsas devizi, həyat fəlsəfəsi də belədir. İnanıram ki, Türkiyədə olduğu kimi, Azərbaycanda da media terroruna son qoyulacaqdır. Yalançılar, böhtançılar demokratik qaydalar çərçivəsində layiqli cəzalarını alacaqlar.