Şəhid anası Lalə Şirzadova: Öz həyatını Vətən yolunda qurban verənlər heç vaxt unudulmayacaq
Bakı, 30 yanvar, AZƏRTAC
“Vətən yer üzündə ən müqəddəs məkandır, onun torpağının hər qarışı doğmadır. Torpağı bizə doğma edən üzərinə tökülən şəhid qanıdır. Oğlum məhz bu müqəddəs yolda həlak olub”, - deyə Qarabağ müharibəsində şəhidlik zirvəsinə yüksəlmiş Famil Şirzadovun anası Lalə xanım deyib.
AZƏRTAC xəbər verir ki, Prezident İlham Əliyev və birinci xanım Mehriban Əliyevanın Prezident Sarayında şəhid ailələri ilə keçirdiyi görüşdə iştirak edənlər arasında Lalə Şirzadova da olub. Onun oğlu Famil 1992-ci ildə Laçın uğrunda gedən döyüşlərdə şəhidlik zirvəsinə yüksəlib.
Ana şəhid ailələrinə dövlət tərəfindən birdəfəlik ödəmələrin verilməsinə münasibət bildirərək deyib: “Dövlət başçısı Azərbaycanın ərazi bütövlüyünü qorumaq uğrunda həlak olanların şəhidliyi barədə ən uca sözlər söylədi, onların xatirəsinə ehtiramını ifadə etdi. Vətən şəhidlərin çiynində yüksəlir. Onlar Vətəni öz ölümləri ilə, öz həyatları bahasına qorudular. Dövlət tərəfindən onlara göstərilən ehtiram bir şəhid anası kimi məni də qürurlandırır. Bu yolda qurban getmək əsl qəhrəmanlıqdır. Fəxr edirəm ki, Famil də həmin qəhrəmanlardan biridir və onun şücaəti xalqımız tərəfindən heç vaxt unudulmayacaq. Prezident İlham Əliyevin hərbi qulluqçuların vərəsələri ilə görüşündə mənim gəldiyim qənaət belə oldu”.
Bölmənin digər xəbərləri
