SƏHİYYƏ NAZİRLİYİNDƏ TÜRKİYƏ TALASSEMİYA FEDERASİYASININ PREZİDENTİ İLƏ GÖRÜŞ KEÇİRİLMİŞDİR
Səhiyyə Nazirliyinin mətbuat xidmətindən AZƏRTAC-a bildirmişlər ki, iyunun 6-da nazir Oqtay Şirəliyev Türkiyə Talassemiya Federasiyasının prezidenti, professor Duran Canatanla görüşmüşdür.
Görüşdə Türkiyədə son 30 ildə bu sahədə qazanılan nailiyyətlər, eləcədə Azərbaycanda talassemiya və ona qarşı mübarizə tədbirləri müzakirə edilmişdir.
Federasiyanın işi barədə məlumat verən Duran Canatan 2010-cu ildə nəzərdə tutulmuş Beynəlxalq Talassemiya Konqresinin Bakıda keçirilməsini təklif etmişdir. Qonaq federasiyanın Türkiyə Cümhuriyyətinin Səhiyyə Nazirliyi ilə birgə apardığı maarifləndirmə və profilaktik tədbirlər nəticəsində Egey, Aralıq dənizi bölgələrində yeni doğulmuş uşaqlar arasında xəstəliyin 90 faiz azaldığını diqqətə çatdırmışdır.
Nazir Oqtay Şirəliyev Azərbaycanda talassemiyaya qarşı mübarizə tədbirlərinin həyata keçirilməsi üzrə təsdiq olunmuş Dövlət Proqramı, hökumət və qeyri-hökumət təşkilatlarının səyləri, habelə tikilməkdə olan Talassemiya Mərkəzi binasının ilin sonunadək fəaliyyətə başlayacağı barədə ətraflı məlumat vermişdir.
Sonda Duran Canatan azərbaycanlı mütəxəssislərin Türkiyədə təkmilləşdirmə kursu keçmələri haqqında təklifləri nazir Oqtay Şirəliyevə təqdim etmişdir.
Bölmənin digər xəbərləri
