ŞƏKİ QƏDİM SİVİLİZASİYALAR DİYARIDIR
Şəki Şəhər İcra Hakimiyyəti, Azərbaycan Milli Elmlər Akademiyasının Tarix İnstitutu, Mədəniyyət və Turizm Nazirliyinin birgə təşkilatçılığı ilə iyunun 27-28-də Şəkidə “Şəki - qədim sivilizasiyalar diyarı” devizi ilə beynəlxalq tədbir keçiriləcəkdir. Tədbirdə xarici ölkələrin Azərbaycandakı səfirlikləri, bir sıra dövlətlərin nümayəndə heyətləri, habelə görkəmli elm xadimləri, tarixçi alimlər və digər qonaqlar iştirak edəcəkdir.
Təşkilat komitəsinin sədri, şəhər icra hakimiyyəti başçısının təhsil, səhiyyə və mədəniyyət məsələləri üzrə müavini Zərinə Cavadova AZƏRTAC-a bildirmişdir ki, Şəkidə bəşər sivilizasiyasının möhkəm təməl sütunları, zəngin tarixi-mədəni kökləri vardır. Azərbaycan xalqının tarixində böyük bir mərhələni təşkil edən qədim alban abidələri, islam-türk mədəniyyətinin zəngin tarixini özündə birləşdirən memarlıq inciləri onu göstərir ki, Şəki xalqımızın min illərlə yaşatdığı tarixi özündə qoruyub saxlamaqla yanaşı, həm də müasirliyin, mədəniyyətlərarası dəyərlərin aşkar edilməsində mühüm rol oynayır.
Tədbirin gündəliyinə gəldikdə isə, iyunun 27-də AMEA Tarix İnstitutunun dəstəyi ilə Azərbaycan Müəllimlər İnstitutu Şəki filialının akt zalında “Şəki - qədim sivilizasiyalar diyarı” mövzusunda beynəlxalq konfrans keçiriləcəkdir. Konfransda Şəkinin qədim, orta əsrlər və müasir tarixinə aid məruzələr dinləniləcəkdir. İyunun 28-də Şəki şəhərindəki Heydər Əliyev adına parkda beynəlxalq tədbirin təntənəli açılış mərasimi olacaqdır. Tədbir iştirakçıları Fazıl kəndində yerləşən və eramızdan əvvəl birinci minilliyin sonuna aid olan qədim yaşayış məskəni - “Əbədi sükut dünyası” adlı labirintlə tanış olacaq, Kiş kəndindəki erkən orta əsrlərə aid qədim alban məbədinə baş çəkəcəklər. Tədbir Şəki şəhərindəki “Yuxarıbaş” Dövlət Tarix Memarlıq Qoruğuna daxil olan Qala divarlarının ərazisində davam etdiriləcəkdir.
Bölmənin digər xəbərləri
