Kiyev, 16 oktyabr, AZƏRTAC

İlham Əliyevin 20 il bundan əvvəl birinci müddətə Prezident seçilməsi təkcə Azərbaycan xalqı üçün deyil, dünya birliyi üçün də əlamətdar hadisədir. Çünki İlham Heydər oğlunun uğurlu siyasəti geosiyasi proseslərə və dünya gündəminə böyük təsirə malikdir.

Bu sözləri AZƏRTAC-a açıqlamasında Ukrayna Ali Radasının xalq deputatı Sergey Naqornyak bildirib.

O qeyd edib ki, Prezident İlham Əliyev bir çoxları üçün faktiki olaraq qeyri-mümkün olanı gerçəkləşdirib - mürəkkəb geosiyasi çağırışlar fonunda Azərbaycanın ərazi bütövlüyünü bərpa edib. Bu isə dünya gündəminə öz təsirini göstərib və siqnal rolunu oynayıb - beynəlxalq qurumların fəaliyyətsizliyinə baxmayaraq, ərazi bütövlüyünün bərpası, işğaldan azad edilmiş ərazilərin reinteqrasiyası və yenidən qurulması, qanunsuz silahlı və terrorçu birləşmələrə qarşı mübarizə mümkündür.

“Düşünürəm ki, dünya nizamının yeni arxitekturası, eləcə də beynəlxalq hüququn normalarının həyata keçirilməsi üçün yeni institut və mexanizmlər formalaşanda Prezident İlham Əliyev bu prosesin fəal iştirakçıları sırasında olacaq. Axı Azərbaycan xalqı da Ukrayna xalqı kimi, beynəlxalq hüquqa, humanizmə və insan hüquqlarına hörmətin təmin ediləcəyi dünyamızın gələcəyi uğrunda mübarizə aparır.

Qeyd etmək istəyirəm ki, Prezident İlham Əliyev Azərbaycan xalqının Ümummilli Lideri Heydər Əliyevin müdrik siyasətini uğurla davam etdirir, xalqının rifahını yüksəldir və dövlətinin inkişafını təmin edir. Azərbaycanın dünya arenasındakı təsiri artmaqdadır və bu, beynəlxalq ictimaiyyətə yalnız fayda gətirir. Axı Prezident İlham Əliyev dövlətlərin suverenliyinə, beynəlxalq hüquqa və humanizmə riayət olunması məsələsinin aktuallaşdırılması üçün həmişə böyük səylər göstərib”, - deyə Sergey Naqornyak qeyd edib.

Ukrayna Ali Radasının deputatı vurğulayıb ki, heç şübhəsiz, Prezident İlham Əliyev Ukrayna-Azərbaycan münasibətlərinin inkişafında da mühüm rol oynayıb.

“2022-ci ilin əvvəlində (Prezident İlham Əliyevin Ukraynaya işgüzar səfəri - red.) yüksək səviyyəli danışıqların aparıldığı, o cümlədən dövlətlərimizin nazirlikləri arasında müqavilələrin imzalandığı səfər çox əlamətdar və məhsuldar oldu. Düşünürəm ki, o cümlədən 2022-ci ilin əvvəlində Prezidentinizin məhsuldar səfəri sayəsində ölkələrimiz arasında münasibətlər mürəkkəb geosiyasi çağırışlara və Rusiya-Ukrayna müharibəsinə baxmayaraq, indi də inkişaf etməkdədir. Bu gün Prezident İlham Əliyev beynəlxalq arenada ən uğurlu və nüfuzlu dövlət başçılarından biridir, həmçinin təkcə Azərbaycanın deyil, həm də dünya siyasətinin tarixini yazmaqdadır. Şadam ki, bütün bu 20 il təkcə Azərbaycanın inkişafı və Heydər Əliyev ənənələrinin davam etdirilməsi dövrü deyil, həm də Ukrayna-Azərbaycan dialoqunun və əməkdaşlığının fəal davam etdirilməsi deməkdir. Bu isə xalqlarımıza ancaq fayda verir və ölkələrimizin milli maraqlarının beynəlxalq aləmdə gerçəkləşməsinə gətirib çıxarır, - deyə S.Naqornyak vurğulayıb.

Emil Hüseynli

AZƏRTAC-ın xüsusi müxbiri

Kiyev