SƏRHƏDSİZ KİTAB
MDB-də kitaba kömək haqqında bəyannamə qəbul edilməsi planlaşdırılır. MDB İcraiyyə Komitəsinin mətbuat xidmətindən AZƏRTAC-a verilən məlumata görə, Birlik ölkələrinin ekspertlərinin iyunun 18-19-da Minskdə keçirilmiş iclasında bu sənədin layihəsi bəyənilmişdir.
İcraiyyə Komitəsi sədrinin, Birliyin icraçı katibinin müavini Naurız Aydarov qeyd etmişdir ki, 2008-ci ilin MDB-də Ədəbiyyat və Mütaliə İli elan edilməsi faktı bu sənədə xüsusi aktuallıq verir. Bu il çərçivəsində milli ədəbiyyatların klassiklərindən Əbu Abdulla Rudəki, Mikayıl Müşfiq və başqalarının yubileylərinin bayram kimi qeyd edilməsi planlaşdırılır. Kitab nəşrinin, qarşılıqlı tərcümələrin, kitabxana işinin inkişafına dair konkret tədbirlər də nəzərdə tutulmuşdur.
İcraiyyə Komitəsi sədrinin müavini demişdir: “Bu cür ardıcıl, bərabərhüquqlu əməkdaşlıq sərfəli və perspektivlidir. Yeniləşdirilmiş dərsliklərin nəşrindən və gənc yaradıcı işçilərin dəstəklənməsindən başlamış, MDB ölkələrinin ziyalılarının geniş əhatəli illik forumlarının keçirilməsinə qədər bir sıra layihələrin həyata keçirilməsi üzərində iş aparılır”.
Bəyannamədə xüsusi qeyd edilir ki, kitab dövlətlər arasında humanitar və mədəni qarşılıqlı fəaliyyətin maddi rəmzidir. Birlik ölkələri bu bəyannaməni qəbul etməklə “Sərhədsiz kitab” prinsipinin həyata keçirilməsinə şərait yaratmaq niyyətində olduqlarını təsdiq edəcəklər.
Bəyannamənin iştirakçıları hər bir insanın kitab məhsullarını münasib qiymətə almaqla ondan istifadə etmək, mütaliənin inkişafı üzrə proqram işləyib hazırlamaq və onu həyata keçirmək, kitab nəşri, kitabın yayılması, poliqrafiya və kitabxana işi sahəsində çalışan təşkilatların yaradılmasını, fəaliyyətini stimullaşdırmaq hüququnu və imkanını təmin etməyə çalışacaqlar.
Bölmənin digər xəbərləri
