ŞƏRQDƏ İLK DƏFƏ MƏHZ AZƏRBAYCANDA QADINLARA SƏSVERMƏ HÜQUQU VERİLMİŞDİR
90 il əvvəl Azərbaycan qanunverici orqanının təsis edilməsi və cəmi 17 ay fəaliyyət göstərməsinə baxmayaraq, parlament xalqın tarixi taleyində mühüm rol oynamışdır. Azərbaycan Xalq Cümhuriyyətinin hüquqi təməli qoyulmuş, dövlət bayrağı və himni qəbul olunmuş, ana dili dövlət dili elan edilmişdir. O dövrdə Azərbaycanda yaşayan bütün xalqların nümayəndələrinin parlamentdə təmsil olunması isə qanunverici orqanın demokratikliyinin nümunəsi idi.
AZƏRTAC xəbər verir ki, bu sözləri Milli Məclisin sədri Oqtay Əsədov Azərbaycan Parlamentinin 90 illik yubileyinə həsr olunmuş tədbirdə söyləmişdir. O demişdir ki, müasir Azərbaycan parlamentinin formalaşması isə ümummilli lider Heydər Əliyevin adı ilə bağlıdır. Prezident seçilənədək dörd ay parlamentə rəhbərlik edən ulu öndərin xidmətləri sayəsində Azərbaycan parlamenti müstəqilliyin və dövlətçiliyin qorunub saxlanılmasında mühüm addımlar atmışdır.
Prezident İlham Əliyev səkkiz il parlamentin üzvü olduğu müddətdə qanunverici orqanın fəaliyyətinə böyük töhfələr vermiş, “Milli Məclisin beynəlxalq əlaqələri genişlənmişdir” - deyən sədr vurğulamışdır ki, dövlət başçısı prezident seçildikdən sonra da qanunverici orqanın fəaliyyətinə hər zaman böyük diqqət göstərir.
O.Əsədov məlumat vermişdir ki, 1995-ci ildən indiyədək parlamentdə 2500-dən çox qanun və qərar qəbul edilmişdir. Beynəlxalq əlaqələrini genişləndirən Milli Məclis bu gün 7 nüfuzlu beynəlxalq təşkilatın üzvüdür.
Bölmənin digər xəbərləri
