SƏUDİYYƏ ƏRƏBİSTANI MƏDƏNİYYƏTİ GÜNLƏRİNİN İŞTİRAKÇILARI SUMQAYITDA OLMUŞLAR
AZƏRTAC xəbər verir ki, Azərbaycanda Səudiyyə Ərəbistanı mədəniyyəti günlərinin iştirakçıları iyunun 19-da Sumqayıtda olmuşlar. Şəhərin mərkəzi meydanında Sumqayıt sakinləri ənənəvi qonaqpərvərlik nümayiş etdirmişlər. Milli geyimli qızlar qonaqlara gül-çiçək və şərbət vermişlər.
Axşam Üzeyir Hacıbəyov adına mədəniyyət sarayında konsert olmuşdur. Artistlər tamaşaçıları xurmaya və müqəddəs “Zəmzəm” suyuna qonaq etmişlər. Sumqayıtlılar Səudiyyə Ərəbistanından olan incəsənət ustalarının çıxışını alqışlarla qarşılamış, onlara gül dəstələri bağışlamışlar. Böyük uğurla keçən konsertdə folklor rəqs ansamblları və musiqi kollektivləri çıxış etmişdir.
Konsertdə Sumqayıt Şəhər İcra Hakimiyyətinin başçısı Vaqif Əliyev, Səudiyyə Ərəbistanının mədəniyyət və informasiya nazirinin müavini doktor Əbu-Bəkr Əhməd Baqadir və Səudiyyə Ərəbistanının Rusiyadakı səfiri Əli Həsən Əhməd Cəffər iştirak etmişdir.
Bölmənin digər xəbərləri
