Şinzo Abe: KXDR nüvəsizləşdirmə barədə vədini konkret addımlarla möhkəmləndirməlidir
Tokio, 13 mart, AZƏRTAC
Koreya Xalq Demokratik Respublikası (KXDR) nüvəsizləşdirmə barədə öz vədini konkret addımlarla möhkəmləndirməlidir.
AZƏRTAC Kyodo agentliyinə istinadla xəbər verir ki, Yaponiyanın Baş naziri belə bir bəyanatla martın 12-də Koreya Respublikasının Milli Kəşfiyyat Xidmətinin direktoru So Xun ilə görüşü zamanı çıxış edib.
Şinzo Abenin sözlərini sitat gətirən Kyodo agentliyi yazır: “KXDR-in nüvəsizləşdirmə barədə vədini konkret addımlarla möhkəmləndirməsi çox zəruridir”. Yaponiyanın Baş naziri həmçinin vəd edib ki, Yaponiya, Cənubi Koreya və ABŞ Şimali Koreyanın nüvə-raket proqramı və bu ölkənin kəşfiyyat orqanları tərəfindən oğurlanmış yapon vətəndaşları problemlərinin həlli üçün sıx əməkdaşlığı davam etdirəcək və bütün güclərini bu istiqamətə yönəldəcəklər.
Bununla yanaşı, Ş.Abe Yaponiyanın Donald Tramp ilə Kim Çen In arasında görüşün təşkilinə yardım göstərməyə hazır olduğunu da bildirib.
Baş nazirlə görüşdən sonra yapon jurnalistlərə məlumat verən So Xun Ş.Abenin Koreya Respublikasını Prezidenti Mun-çje İnin iki Koreya arasında sülhün qorunması üçün cəhdlərini yüksək qiymətləndirdiyini də deyib.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
