SİYASƏT
“SİZİN ÖLKƏNİZ BAŞQA DÖVLƏTLƏRƏ NÜMUNƏ OLA BİLƏR”
MOSKVANIN VƏ BÜTÜN RUSİYANIN PATRİARXI 11 ALEKSİNİN AZƏRBAYCANA SƏFƏRİ HAQQINDA KİTAB
“Şərq-Qərb” nəşriyyatı Rus pravoslav kilsəsinin /RPK/ başçısı, Moskvanın və bütün Rusiyanın patriarxı zati-müqəddəsləri 11 Aleksinin Azərbaycana ilk səfərinə həsr edilmiş “Sizin ölkəniz başqa dövlətlərə nümunə ola bilər” kitabını çapdan buraxmışdır. 11 Aleksinin ölkəmizə səfərinin yekunları ilə əlaqədar jurnalistlərlə söhbətində dediyi həmin sözlər patriarxın Azərbaycanda hökm sürən və onun özünün şahidi olduğu dini dözümlülük, dostluq mühitini çox yaxşı əks etdirir.
Səfər Azərbaycan Respublikasının Prezidenti Heydər Əliyevin və Qafqaz Müsəlmanları İdarəsinin sədri şeyxülislam Hacı Allahşükür Paşazadənin dəvəti ilə bu ilin mayında həyata keçirilmişdir. Səfər zamanı patriarx 11 Aleksi Azərbaycanın azadlığı və suverenliyi uğrunda canlarından keçmiş vətən övladlarının uyuduğu Şəhidlər xiyabanını ziyarət etmiş, onların xatirəsinə ehtiramını bildirmiş, Təzəpir məscidində ruhanilərin nümayəndələri ilə görüşmüş, Bibiheybət məscidinə getmişdir. O, Azərbaycan qaçqınları ilə də görüşərək, erməni təcavüzü nəticəsində doğma ocaqlarından didərgin salınmış vətəndaşlarımızın necə dözülməz şəraitdə yaşadıqlarını öz gözləri ilə görmüşdür.
Bakı Slavyan Universitetində zati-müqəddəslərinə bu ali məktəbin fəxri doktoru diplomunun təqdim edilməsi patriarxın Azərbaycan Respublikası ilə Rusiya Federasiyası arasında mədəni və dini əlaqələrin genişlənməsində görkəmli xidmətlərinin, xalqlar arasında sülhün və həmrəyliyin möhkəmlənməsinə verdiyi töhfənin qiymətləndirilməsinə sübut olmuşdur.
RPK-nın başçısı Bakı kilsələrində möminlərlə görüşmüş, Müqəddəs Məryəm ana kilsəsində ibadət etmişdir. Mirodaşıyan müqəddəs zövcələr kilsəsinə müqəddəs xaç suyu da çilənmişdir.
Patriarx 11 Aleksinin Azərbaycan Prezidenti Heydər Əliyev ilə qörüşü və Qafqaz Xalqları Ali Dini Şurasının sədri şeyxülislam Hacı Allahşükür Paşazadə ilə birgə bəyannamə imzalaması onun səfərinin mühüm məqamları olmuşdur.
Prezident Heydər Əliyev Rus pravoslav kilsəsinin başçısı, Moskvanın və bütün Rusiyanın patriarxı 11 Aleksinin ölkəmizə tarixdə ilk səfərini Rusiya-Azərbaycan münasibətləri üçün, Azərbaycan üçün, respublikamızda yaşayan pravoslavlar üçün son dərəcə mühüm hadisə adlandırmışdır. Dövlətimizin başçısı bildirmişdir ki, Azərbaycanın rus əhalisi, pravoslav məzhəbinə etiqad edənlərin hamısı xalqımızla və digər dinlərin nümayəndələri ilə həmişə hüquq bərabərliyi şəraitində yaşamışlar. 11 Aleksi nəzərə çarpdırmışdır ki, pravoslavlara Azərbaycanda bəslənilən xeyirxah münasibət hətta bəzi pravoslav ölkələrində də yoxdur, onlar Azərbaycanda “özlərini ikinci dərəcəli adamlar kimi hiss etmirlər”. RPK-nın başçısı 11 Aleksi Bakı və Xəzəryanı bölgənin yeparxiyasına göstərdiyi qayğıya, kömək və dəstəyə görə Azərbaycan Prezidenti Heydər Əliyevi birinci dərəcəli Müqəddəs Mömin Moskva knyazı Daniil ordeni ilə təltif etmişdir.
Kitabda Moskvanın və bütün Rusiyanın patriarxı 11 Aleksinin dövlətimizin başçısına göndərdiyi teleqramın mətni də verilmişdir. Teleqramda RPK-nın başçısı səfər zamanı ona və onu müşayiət etmiş nümayəndə heyətinə göstərilmiş qonaqpərvərliyə görə, ənənəvi dinlərə, “Azərbaycanda özlərini bərabər hüquqlu vətəndaşlar kimi hiss edən” rusdilli əhaliyə dəstək verilməsinə görə təşəkkürünü bildirmişdir.
AZƏRTAC-ın materialları əsasında hazırlanmış zəngin illüstrasiyalı bu nəşrin buraxılışına məsul dövlət müşaviri Hidayət Orucovdur.