SLOVAKİYA GƏLƏN İL AVRO MƏKANINA DAXİL OLACAQDIR
AZƏRTAC-ın xüsusi müxbiri xəbər verir ki, 2009-cu ilin yanvarında avro öz məkanını daha bir ölkə - Slovakiyanın hesabına genişləndirəcəkdir. Bu barədə müvafiq qərar Avropa İttifaqına üzv ölkələrin dövlət və hökumət rəhbərlərinin Brüsseldə keçirilən zirvə toplantısında qəbul edilmişdir. Bununla da beş milyon əhalisi olan Slovakiya 2009-cu il yanvarın 1-dən milli valyutanı - kronu avro ilə əvəzləyəcəkdir. Slovakiyanın avro məkanına daxil olması ilə milli valyutası avro olan ölkələrin sayı 16-ya və vahid valyutadan istifadə edən insanların sayı isə 325 milyona çatacaqdır.
Xatırlaqdaq ki, avro 2002-ci il yanvarın 1-də Avropa İttifaqının 12 üzv ölkəsində (Almaniya, Avstriya, Belçika, İrlandiya, İtaliya, Fransa, Finlandiya, Yunanıstan, Niderland Krallığı, Lüksemburq, Portuqaliya və İspaniya) vahid valyuta kimi dövriyyəyə buraxılmışdır. 2007-ci il yanvarın 1-də Sloveniya, 2008-ci ildə isə Kipr və Malta avro məkanına daxil olmuşlar.
Böyük Britaniya, Danimarka və İsveç istisna olmaqla, Avropa İttifaqının bütün ölkələri büdcə kəsirləri, inflyasiya, xarici borclar və digər kriteriyalar üzrə tələbləri yerinə yetirdiyi təqdirdə avronu milli valyuta kimi qəbul etməlidir.
Bölmənin digər xəbərləri
