Slovakiyada daha bir nazir jurnalistin ölümünə görə istefa verib
Bratislava, 12 mart, AZƏRTAC
Slovakiyada araşdırmaçı jurnalist Yan Kuçiakın qətlindən sonra hökumət üzərində təzyiqlər davam edir. Martın 12-də Slovakiyanın daxili işlər naziri və Baş nazirin müavini Robert Kalinak tutduğu vəzifədən istefa verib.
Y.Kuçiakın ölümündən iki həftə keçməsinə baxmayaraq, ölkənin ictimai-siyasi həyatındakı gərginlik azalmaq bilmir. Ötən həftənin sonunda paytaxt Bratislavada 1989-cu ildən bəri ən böyük nümayişlər keçirilib. Otuz mindən artıq insanın qatıldığı etiraz nümayişlərində jurnalistin ölümünün obyektiv araşdırılması, hökumət dairələrinin mafiya şəbəkələri ilə ehtimal olunan əlaqələrinə aydınlıq gətirilməsi və hazırkı hökumətin istefası tələb olunub.
Hakim Slovakiya Sosial-Demokratlar Partiyasına (SMER) mənsub olan nazir istefa verməsi ilə ölkədə sabitliyin bərpa olunacağına və polisin qətlin açılması üçün apardığı təhqiqatları uğurla başa çatdıracağına ümid bəslədiyini bildirib. Slovakiyanın Baş naziri Robert Fitso daxili işlər nazirinin istefasına tərəfdar olmasa da, hökumətdə təmsil olunan “Most-Hid” partiyasının təzyiqləri öz nəticəsini verib. R.Fitso müxalifəti iki gəncin qətlindən siyasi məqsədlər üçün sui-istifadə etməkdə günahlandırıb və növbədənkənar seçkilərin keçiriləcəyini istisna edib.
Qeyd edək ki, www.aktuality.sk saytının əməkdaşı olan 27 yaşlı araşdırmaçı jurnalist Yan Kuçiak fevralın 25-də nişanlısı ilə birlikdə qətlə yetirilib. Həmkarları onun qətlinin İtaliyanın Ndranqeta mafiya şəbəkəsinin Slovakiyanın iri şirkətləri və hökumət dairələri ilə əlaqələrinə dair ifşaedici araşdırmaları ilə bağlı olduğunu iddia edirlər.
Fevralın 28-də isə Slovakiyanın mədəniyyət naziri Marek Madariç jurnalistin ölümünə görə tutduğu vəzifədən istefa vermişdi.
Elgün Niftəli
AZƏRTAC-ın xüsusi müxbiri
Bratislava
Bölmənin digər xəbərləri
