Slovakiyada Peter Pelleqriniyə yeni hökuməti təşkil etmək səlahiyyəti verilib
Bratislava, 16 mart, AZƏRTAC
Slovakiyada Baş nazir Robert Fitsonun istefasından sonra onun sələfinin kim olacağını çox da gözləmək lazım gəlməyib. Martın 15-də axşam saatlarında Prezident Andrey Kişka Baş nazirin müavini Peter Pelleqriniyə yeni hökuməti təşkil etmək səlahiyyəti verib. Bununla da ölkədə koalisiyalı hökumətin fəaliyyətini davam etdirməsi üçün zəmin yaranıb.
Tədqiqatçı-jurnalist Yan Kuçiakın qətlindən sonra ölkədə baş verən siyasi böhran Baş nazir Robert Fitsonu istefa verməyə məcbur edib. Prezident Andrey Kişkaya istefa ilə bağlı müraciətində R.Fitso istefa üçün növbədənkənar seçkilərin keçirilməməsi, üç partiyadan ibarət koalisiyalı hökumətin fəaliyyətini davam etdirməsi və yeni Baş nazirin hakim Slovakiya Sosial-Demokratlar Partiyası (SMER) tərəfindən təklif olunması şərtlərini irəli sürüb. A.Kiska bu şərtləri qəbul etdikdən sonra ölkə parlamentində deputatların əksəriyyəti P. Pelleqrininin yeni Baş nazir seçilməsi üçün dövlət başçısına müraciət ünvanlayıblar.
Bununla da Slovakiyada növbədənkənar seçkilərin keçirilməsinin qarşısı alınıb. İctimaiyyətin hökumətdaxili siyasi gedişə göstərəcəyi mövqe etiraz nümayişlərinin sayından bəlli olacaq.
Elgün Niftəli
AZƏRTAC-ın xüsusi müxbiri
Bratislava
Bölmənin digər xəbərləri
