SUMQAYITLILAR REFERENDUMDA YÜKSƏK FƏALLIQ NÜMAYİŞ ETDİRMİŞLƏR
Ölkə Konstitusiyasına dəyişikliklər və əlavələrə dair referendumun keçirilməsi, 130 min seçicinin öz iradəsini sərbəst ifadə etməsi üçün Sumqayıtdakı 132 məntəqənin hamısında hər cür şərait yaradılmışdır. Ümumxalq səsverməsi ərəfəsində 3 referendum dairəsinin, habelə məntəqələrin fasiləsiz elektrik enerjisi, rabitə, nəqliyyat, lazım gəldikdə isə tibbi yardımla təmin olunması ilə bağlı bütün məsələlər həll edilmişdi.
Avqustun 24-də referendumda iştirak edən sumqayıtlıların fəallığı, əhval-ruhiyyəsi ümumxalq səsverməsi gününə hazırlıq dövründə səmərəli iş aparıldığını sübut edirdi. Referendum komissiyalarının üzvləri ilə söhbət zamanı məlum oldu ki, seçicilər səsvermə prosedurunu dəqiq və müstəqil surətdə yerinə yetirmişlər.
Referendumun gedişini həm yerli, həm də xarici müşahidəçilər izləyirdilər. Dairə komissiyaları onlara daxil olan bəyanatlara və siqnallara operativ surətdə münasibətlərini bildirirdilər.
Şəhərin hüquq-mühafizə orqanlarında seçki prosedurları sahəsində hüquq normalarının pozulması ilə əlaqədar cinayət və inzibati məsuliyyət faktları qeydə alınmamışdır. Artıq saat 13.00-da Sumqayıt şəhərindəki 38 nömrəli birinci seçki dairəsində konstitusiyaya əlavələr və dəyişikliklər edilməsi üzrə referendum baş tutmuşdu, belə ki, səsvermə siyahılarında qeydə alınanların 56 faizi səs vermişdi.
Ümumxalq səsverməsi günündə sumqayıtlıların fəallığı, mütəşəkkilliyi, Azərbaycanda demokratik, hüquqi, dünyəvi dövlət quruculuğu prosesinin xalq tərəfindən dəstəklənməsinin daha bir sübutu oldu.
Bölmənin digər xəbərləri
