Şuşakənd sakini: Həsrətində olduğum torpaqda yaşamaq böyük xoşbəxtlikdir
Xocalı, 1 oktyabr, AZƏRTAC
Böyük Qayıdış Proqramı çərçivəsində Xocalı rayonunun Şuşakənd kəndinə köçürülən ailələrdən biri də Taryel Cəfərovun ailəsidir. Birinci Qarabağ müharibəsi zamanı doğma yurdundan məcburi köçkün düşən T.Cəfərov uzun illər Şəkidə yaşadıqdan sonra təxminən bir il əvvəl ailəsi ilə birlikdə Şuşakəndə qayıdıb.
Taryel Cəfərov AZƏRTAC-ın bölgə müxbirinə bildirib ki, ömrünün böyük hissəsini təhsil sahəsinə həsr edib. Uzun illər müəllim, daha sonra məktəb direktoru kimi fəaliyyət göstərib. Hazırda təqaüddə olan T.Cəfərov doğma yurda qayıtdıqdan sonra burada təsərrüfat yaradıb. O, iribuynuzlu mal-qara, ev quşları saxlayır, arıçılıqla məşğul olur.
Taryel Cəfərov deyir ki, köçkünlük illərində ən böyük arzusu doğma yurda qayıtmaq olub.
“Ötən 30 il biz çox çətin şəraitdə torpaq həsrəti ilə yaşadıq. Nəhayət Prezidentimizin rəhbərliyi və Ordumuzun şücaəti ilə torpaqlarımız azad olundu. Artıq arzularımız çin olub, bir ildir ki, biz bu gözəl diyarda – Şuşakənd kəndində yaşayırıq”, - deyə o bildirib.
Doğma yurda qayıdış Taryel Cəfərovun ailəsinin həyatında da yeni mərhələnin başlanğıcı olub. Ailədə təhsil ənənəsi də davam edir. Həyat yoldaşı Xankəndi şəhərinin Kərkicahan qəsəbəsində yerləşən 1 nömrəli tam orta məktəbdə Azərbaycan dili və ədəbiyyat müəllimi kimi çalışır. Qızı isə Xocalı şəhərindəki orta məktəblərdən birində ingilis dili müəllimidir.
Uzun illər məcburi köçkün həyatı yaşayan Taryel Cəfərov üçün doğma yurda qayıdış xüsusi məna daşıyır. O bildirir ki, illər sonra həsrətində olduğu torpaqda yaşamaq, burada öz təsərrüfatını yaratmaq və ailəsi ilə birlikdə gələcək üçün planlar qurmaq onun üçün böyük xoşbəxtlikdir.
Müxbir – Tahir Ağaməmmədov
Bölmənin digər xəbərləri
