Tamerlan Məmmədov: Qızıl medal üçün yarışırdım, lakin əldə etdiyim nəticə də pis deyil
Qəbələ, 10 may, Şahnəzər Bəşirov, AZƏRTAC.
Rəqiblərim çox peşəkar idi, yarış çətin keçdi və son nəticədə ikinci yeri tutdum. Burada təşkilatçılıq çox yüksək səviyyədədir. Qəbələ qran-prisi mənim yaddaşımda unudulmaz anlarla qalacaq. Belə ki, beynəlxalq qran-pri yarışlarının gümüş medalını qazandım. Bu medal həm də mənim beynəlxalq səviyyəli yarışlarda əldə etdiyim ən böyük uğurlardan biridir. Buna görə çox sevinirəm.
Bu sözləri AZƏRTAC-ın bölgə müxbirinə müsahibəsində Qəbələ Stend və Ox Atıcılığı Kompleksində Heydər Əliyevin xatirəsinə həsr edilən Beynəlxalq Qran-pri yarışlarında səngər stend atıcılığı üzrə gümüş medal qazanan Tamerlan Məmmədov deyib.
Azərbaycanlı atıcı güclü rəqibi olan Olimpiya çempionu Aleksey Alipovla sonadək mübarizə apardığını və ondan cəmi bir xal geri qalaraq gümüş medal qazandığını bildirib: “Mən qızıl medal üçün yarışırdım, lakin əldə etdiyim bu nəticə də pis deyil. Ümumiyyətlə, qazandığım medalın əyarı önəmli deyil, əsas odur ki, ulu öndər Heydər Əliyevin xatirəsinə həsr edilən bu mötəbər yarışda iştirak etdim və buna görə özümü xoşbəxt sanıram”.
Bölmənin digər xəbərləri
