TANINMIŞ ABŞ KARİKATURAÇI RƏSSAMININ BAKIDA FƏRDİ YARADICILIQ SƏRGİSİ AÇILMIŞDIR
AZƏRTAC xəbər verir ki, iyunun 20-də ABŞ-ın ölkəmizdəki səfirliyinin təşkilatçığı ilə “Abşeron” Rəsm Qalereyasında tanınmış ABŞ karikaturaçı rəssamı Kevin Kallagerin fərdi yaradıcılıq sərgisi açılmışdır.
Sərginin ekspozisiyasına rəssamın 50-yə yaxın əsəri daxildir.
Kevin Kallager (KAL) Londonda çıxan nüfuzlu “Ekonomist” jurnalının ştatlı karikaturaçı rəssamıdır. O, 1977-ci ildə Harvard kollecini fərqlənmə ilə bitirmiş və Böyük Britaniyaya köçmüşdür. Orada Brayton basketbol klubunun üzvü olmuşdur. Karikaturaçılıq fəaliyyətinə də məhz həmin illərdə başlamış Kallager Trafalqar meydanında turistlər üçün karikaturalar çəkmişdir. 1978-ci ildə “Ekonomist” jurnalı ilə karikaturaçı kimi əməkdaşlığa başlamışdır. Londonda rəssam “Observer”, “Sandi Teleqraf”, “Tudey” və “Meyl on Sandi” qəzet və jurnalları üçün də karikaturalar çəkmişdir.
1988-ci ildə vətənə qayıdan rəssam “Baltimor San” qəzetində kairkaturaçı kimi işə başlamış və 17 ildə qəzet üçün 4000-dən çox karikatura çəkmişdir. Həmin dövr ərzində “Ekonomist” jurnalında rəssamın hər həftə iki əsəri çap olunmuşdur.
Əsərləri dünyanın bir sıra nüfuzlu qalereyalarında nümayiş etdirilən rəssamın yaradıcılığı həm də beynəlxalq mükafatlara layiq görülmüşdür.
Azərbaycanda isə onun karikaturaları ilk dəfədir nümayiş etdirilir. Karikaturalar, əsasən, ABŞ-ın nüfuzlu dövlət xadimlərinə həsr edilmişdir. Lakin Amerika cəmiyyətini narahat edən digər məsələlər də rəssamın gözündən qaçmamışdır. Kevin Kallagerin yaradıcılığı bir rəmz sayıla bilər. ABŞ vətəndaşları öz ölkələrinin hakimiyyətinə tənqidi yanaşır, lakin bu, onlara öz vətənini sevməyə, ona loyal olmağa və dövlət xadimlərinə hörmətlə yanaşmağa heç də mane olmur.
Açılış mərasimində bütün bunlar barədə ətraflı danışılmışdır. ABŞ-ın Azərbaycandakı səfiri xanım Ann Ders, qalereyanın direktoru Eldəniz İbrahimov və başqaları ölkələrimiz arasında mədəni əlaqələrin genişləndirilməsində belə tədbirlərin əhəmiyyətini vurğulamışlar.
Sərgi iyunun 22-dək davam edəcəkdir.
######
 |
 |
Bölmənin digər xəbərləri
