Tbilisidə Cənubi Qafqaz respublikaları gənclərinin kinofestivalı keçiriləcək
Tbilisi, 13 mart, AZƏRTAC
Martın 19-dan aprelin 2-dək Tbilisidə Cənubi Qafqaz respublikaları gənclərinin “Nəsil” (Pokolenie) adlı kinofestivalı keçiriləcək.
AZƏRTAC xəbər verir ki, kinofestival Gürcüstan, Azərbaycan və Ermənistanın müstəqillik əldə etmələrinin 100 illiyinə həsr olunur.
Gürcüstanın Mədəniyyət və İdman Nazirliyindən bildiriblər ki, bu ildən başlayaraq hər il keçiriləcək festival “Cənubi Qafqaz respublikaları gənclərinin beynəlxalq festivalı” statusunu alacaq.
Əsas məqsəd gənclərin kino mədəniyyəti və təhsilinin inkişafına yardım göstərməkdir.
Festival çərçivəsində gənclərin kino yaradıcılığı, kino sahəsində analitik təhlil bacarığı və digər qabiliyyətləri üzə çıxarılacaq, onlar üçün ustad dərsləri, mühazirələr, konfrans və digər əyləncəli proqramlar da təşkil olunacaq.
Festivalda 13-18 yaş arasında 300 nəfər yeniyetmə və gəncin iştirakı nəzərdə tutulub.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
