TƏBİİ FƏLAKƏT FACİƏ TÖRƏTMİŞDİR
Bir neçə saat fasiləsiz davam edən güclü leysan yağışları Balakən rayonunda yenidən ciddi problemlər yaratmış və faciəyə səbəb olmuşdur. Katex, Mazan və Balakən çayları daşaraq öz məcrasından çıxmış, körpüləri, mühafizə bəndlərini yuyub aparmış, əkin sahələrini su basmış, xeyli mal-qara tələf olmuşdur. Sel suları 11 yaşlı Təbriz Abdullayevin həyatına son qoymuşdur.
Rayon fövqəladə hallar komissiyasından müxbirimizə demişlər ki, təbii fəlakətin nəticələrini aradan qaldırmaq, mümkün yeni daşqınlara hazırlıq üçün təcili tədbirlər görülmüş, bütün texnika, canlı qüvvə bu işlərə cəlb olunmuş, fəlakət zonasında fasiləsiz iş rejimi yaradılmışdır.
