TOPDANSATIŞ TİCARƏT MƏRKƏZİNDƏ YANĞIN BAŞ VERMİŞDİR
İyunun 30-da saat 13.00 radələrində Nizami rayonu, Naxçıvanski küçəsi, 38-də yerləşən ikimərtəbəli topdansatış ticarət mərkəzində güclü yanğın baş vermişdir. Baş Dövlət Yanğın Təhlükəsizlik İdarəsindən AZƏRTAC-ın müxbirinə bildirmişlər ki, binanın 2-ci mərtəbəsində başlamış yanğın nəticəsində “Sunay” şirkətinə məxsus 500 kvadratmetr sahəsi olan elektrik və tikinti materialları anbarı və bir neçə mağaza içərisindəki mallarla birlikdə külə dönmüşdür. Hadisə yerinə ona yaxın yanğınsöndürən maşın cəlb olunsa da, yanğını iki saat yarımdan sonra söndürmək mümkün olmuşdur. Elektrik naqillərində baş vermiş qısaqapanmadan törəyən hadisə zamanı ciddi xəsarət alan olmamışdır. Hazırda dəymiş ziyan dəqiqləşdirilir. Faktla bağlı təhqiqat aparılır.
