“TOTAL E&P AZƏRBAYCAN” ŞİRKƏTİNİN YENİ BAŞ MENECERİ FƏALİYYƏTƏ BAŞLAMIŞDIR
AZƏRTAC xəbər verir ki, “Total E&P-Azərbaycan” şirkətinin yeni baş meneceri Mark Föyyad Azərbaycanda fəaliyyətə başlamışdır.
Bu münasibətlə iyunun 18-də “İSR Plaza” mehmanxanasında keçirilən mərasimdə çıxış edən “Total” şirkətinin kontinental Avropa və Orta Asiya regionu üzrə vitse-prezidenti Arno Breyak Azərbaycanda uğurla həyata keçirilən nəhəng enerji layihələrinin şirkətin baş ofisində böyük maraqla izlənildiyini bildirmişdir. Azərbaycanın karbohidrogen ehtiyatlarının mənimsənilməsi ilə bağlı şirkətin 3 layihənin iştirakçısı olduğu və bu işlərin uğurla davam etdirildiyi xüsusi vurğulanmışdır.
“Total E&P-Azərbaycan” şirkətinin 3 il baş meneceri vəzifəsində çalışmış Tyeri Norman Azərbaycanda olduğu dövrdə qədim mədəniyyətə malik xalqımızın heç zaman unuda bilməyəcəyi qonaqpərvərliyindən, ailəsi ilə birlikdə burada çoxsaylı dostlar tapmasından danışmışdır. Sabiq baş menecer Azərbaycanda olduğu dövrdə göstərilən hər cür yardıma görə Prezident İlham Əliyevə dərin minnətdarlığını bildirmiş, istehsalla bağlı həyata keçirilən sosial layihələrin bundan sonra da uğurla davam etdiriləcəyinə əminliyini ifadə etmişdir. T.Norman şirkət tərəfindən son vaxtlar mədəniyyətlə bağlı layihələrin reallaşdırılmasına göstərdiyi yardıma görə professor Nərgiz xanım Paşayevaya da təşəkkürünü bildirmişdir.
Şirkətin yeni baş meneceri Mark Föyyad həmkarı tərəfindən başlanmış işlərin uğurla davam etdiriləcəyinə, əməkdaşlığın yeni layihələrlə daha da zənginləşəcəyinə inandığını vurğulamışdır. ARDNŞ ilə “Total” şirkəti arasında “Xəzər dənizinin Azərbaycan sektorunda “Abşeron” dəniz blokunun kəşfiyyatı, işlənməsi və hasilatın Pay Bölgüsü haqqında Saziş”in əsas kommersiya prinsipləri və müddəaları haqqında Müqavilə”nin imzalanmasını yüksək qiymətləndirən yeni baş menecer, bu hadisəni iki şirkət arasında əməkdaşlığın yeni mərhələsinin başlanğıcı kimi yüksək dəyərləndirmişdir.
######
 |
 |
Bölmənin digər xəbərləri
