Tunisdə Ərəb Dövlətləri Liqasının yüksək səviyyəli 30-cu beynəlxalq sammiti işə başlayıb
Qahirə, 31 mart, AZƏRTAC
Martın 31-də Tunisdə Ərəb Dövlətləri Liqasının (ƏDL) yüksək səviyyəli 30-cu beynəlxalq yubiley sammiti işə başlayıb.
AZƏRTAC xəbər verir ki, ərəb ölkələrinin dövlət və hökumət başçılarının qatıldıqları iclasın gündəliyinə regionun əsas problemlərinə dair 20-yə yaxın məsələ, o cümlədən Fələstin problemi, Suriya, Liviya və Yəməndəki böhranlar, Sudanda sülhə və inkişafa dəstək, ərəb ölkələrinin təhlükəsizliyi və s. məsələlər çıxarılıb. Sammitdə, həmçinin Qolan yüksəkliklərinin ABŞ tərəfindən İsrailin ərazisi kimi tanınması məsələsinin də müzakirəsi və bu barədə yekdil mövqenin ifadə olunması gözlənilir.
Ərəb Dövlətləri Liqasının baş katibi Əhməd Əbul Qeyt martın 29-da təşkilatın xarici işlər nazirləri səviyyəsində Tunisdə keçirilən toplantısında çıxışında ABŞ Prezidenti Donald Trampın İsrailin Qolan təpələri üzərində suverenliyini tanıması barədə qərarını səhv addım kimi qiymətləndirib. O xatırladıb ki, BMT Təhlükəsizlik Şurası İsrailin Qolan təpələri üzərində suverenliyini tanımayan qətnamələr qəbul edib və beynəlxalq aləmdə mövqeyindən asılı olmayaraq, istənilən dövlətin bu fakta zidd bəyanatının vəziyyəti dəyişməyəcəyini vurğulayıb.
Tunisdə keçiriləcək zirvə görüşdə BMT-nin baş katibi Antonio Quterreş, Avropa İttifaqının xarici işlər və təhlükəsizlik siyasəti üzrə ali nümayəndəsi Federika Moqerini, İslam Əməkdaşlığı Təşkilatının baş katibi Yusif Əl-Usaymin, Afrika İttifaqı Komissiyasının sədri Musa Faki də iştirak edəcəklər.
Asya Hacızadə
AZƏRTAC-ın xüsusi müxbiri
Qahirə
Bölmənin digər xəbərləri
