Türkdilli ölkələrdə təşkil olunacaq kinofestivallarda ölkəmizin iştirakı müzakirə edilib
Bakı, may 3, AZƏRTAC
5-ci Ümumdünya Mədəniyyətlərarası Dialoq Forumu çərçivəsində mədəniyyət naziri Əbülfəs Qarayevlə TURKPA-nın Baş katibi Altınbek Mamayusupov arasında görüş keçirilib.
AZƏRTAC xəbər verir ki, görüşdə türkdilli ölkələrdə təşkil olunacaq kinofestivallarda Azərbaycanın iştirakı müzakirə olunub.
Görüşdə türk ölkələri arasında mədəniyyət və kinematoqrafiya sahəsində əməkdaşlığın genişləndirilməsi üçün təkliflər səsləndirilib.
Əbülfəs Qarayev bunun üçün qanuni mexanizmlərin işlənib hazırlanmasının vacib olduğunu qeyd edib. O, Azərbaycanda kinematoqrafiyanın inkişafı istiqamətində görülən işlərdən danışıb. Azərbaycan kinolarının beynəlxalq festivallarda uğurlu çıxış etdiyini və mükafatlara layiq görüldüyünü bildirib.
Görüşdə türk ölkələri, o cümlədən Azərbaycanla kinematoqrafiya sahəsində ortaq layihələrin keçirilməsi təklifi edilib.
Qeyd olunub ki, bu cür layihələr ölkələrimizdə kinematoqrafiya sahəsində əməkdaşlığın inkişafına təkan verəcək.
Bölmənin digər xəbərləri
