Bakıda rəsmi səfərdə olan Türkiyə Respublikası baş nazirinin müavini, dövlət naziri Dövlət Baxçalı və onun başçılıq etdiyi nümayəndə heyətinin üzvləri mayın 7-də səhər Fəxri xiyabana gəldilər. 

Dövlət Baxçalı əvvəlcə Azərbaycanın keçmiş prezidenti Əbülfəz Elçibəyin məzarını ziyarət edərək əklil qoydu.

Daha sonra qonaqlar Fəxri xiyabanı gəzdilər. Bakı Şəhər İcra Hakimiyyətinin başçısı Hacıbala Abutalıbov onlara məlumat verərək bildirdi ki, burada Azərbaycanın ən görkəmli siyasi və dövlət, mədəniyyət, incəsənət, ədəbiyyat, elm, hərbi xadimləri dəfn olunur.

Cənab Baxçalı və nümayəndə heyətinin üzvləri Bülbülün, Səməd Vurğunun, Cəlil Məmmədquluzadənin, Seyid Cəfər Pişəvərinin, Rəşid Behbudovun, Müslüm Maqomayevin, Əziz Əliyevin, Zərifə xanım Əliyevanın və başqalarının məzarlarını ziyarət etdilər.

Azərbaycan xarici işlər nazirinin müavini Xələf Xələfov, Türkiyənin Bakıdakı səfiri Əhməd Ünal Çeviköz qonaqlarla birlikdə Fəxri xiyabanda olmuşlar.

MÜXALİFƏT PARTİYALARININ NÜMAYƏNDƏLƏRİ İLƏ 

GÖRÜŞ

Türkiyə baş nazirinin müavini, dövlət naziri Dövlət Baxçalı həmin gün Türkiyənin Bakıdakı səfirliyində müxalifət partiyalarının nümayəndələri ilə görüşmüşdür. 

Söhbət zamanı Türkiyə-Azərbaycan münasibətləri, Ermənistan-Azərbaycan, Dağlıq Qarabağ münaqişəsinin həlli və digər məsələlər ətrafında fikir mübadiləsi aparıldı.

Cənab Baxçalı bir daha bəyan etdi ki, Azərbaycanın işğal edilmiş torpaqları azad olunmayınca, münaqişə ədalətlə həll edilməyincə, qaçqınlar öz yurdlarına qayıtmayınca Türkiyə ilə Ermənistan arasında hər hansı bir əlaqə ola bilməz. Bu problemlərin həll edilməsində Türkiyə həmişə olduğu kimi, bundan sonra da Azərbaycanı, onun ədalətli mübarizəsini dəstəkləyəcəkdir.

Görüşdə Türkiyənin Bakıdakı səfiri Əhməd Ünal Çeviköz iştirak edirdi.

TÜRKİYƏ RESPUBLİKASI BAŞ NAZİRİNİN MÜAVİNİNƏ

BDU-NUN FƏXRİ DOKTORU DİPLOMU

TƏQDİM OLUNMUŞDUR

Ölkəmizdə rəsmi səfərdə olan Türkiyə Respublikası Baş Nazirinin müavini, Dövlət Naziri Dövlət Baxçalıya mayın 7-də Bakı Dövlət Universitetinin fəxri doktoru diplomu təqdim edilmişdir.

Mərasim Türkiyənin və Azərbaycanın dövlət himnlərinin səslənməsi ilə başlandı. Sonra BDU-nun rektoru, Azərbaycan Milli Elmlər Akademiyasının müxbir üzvü Abel Məhərrəmov mərasimi açaraq, Türkiyə Respublkası Baş Nazirinin müavini Dövlət Baxçalını və onun rəhbərlik etdiyi nümayəndə heyətini respublikamızın bu qocaman ali təhsil ocağında salamlamaqdan məmnunluq duyduğunu bildirdi.

BDU-nun tarixi və fəaliyyəti barədə qonağa ətraflı məlumat verən A.Məhərrəmov dedi ki, hazırda universitetin 15 fakultəsində 13 min tələbə təhsil alır. Onların arasında Türkiyədən, o cümlədən dünyanın 15 ölkəsindən gəlmiş gənclər də var. 500-qədər xarici vətəndaş burada 46 ixtisas üzrə bakalavr, 120 ixtisas üzrə magistr pilləsində təhsil alır.

Natiq dedi ki, bu gün dünyanın bir çox ali məktəbləri ilə əməkdaşlıq edən universitet ABŞ, Fransa, Yaponiya kimi ölkələrin elm ocaqları ilə ümumi məbləği milyon dollarla ölçülən proqramlər və qrantlar üzərində çalışırlar.

Rektor bildirdi ki, uzun əsrlər boyu xalqlarımız arasında yaranmış qardaşlıq münasibətləri indi strateji tərəfdaşlıq səviyyəsinə qaldırılmışdır. Təhsil sahəsində də münasibətlər geniş inkişaf edir. Türkiyə dövlətinin yardımı ilə BDU-da “Türk odası” yaradılmışdır. Abel Məhərrəmov diplomların qarşılıqlı surətdə tanınması, universitetdəki təhsil posesində türkiyəli alimlərin daha fəal iştirak etməsinin vacibliyini nəzərə çarpdırdı, bu məsələlərin həllinə kömək göstərməsini qonaqdan xahiş etdi.

Universitetin rektoru dedi ki, BDU-nun fəxri doktoru adına layiq görülmək böyük şərəfdir və bu adı daşıyanlar arasında bir sıra dövlət xadimləri vardır. Natiq bildirdi ki, Türkiyə Respublikası baş nazirinin müavini Dövlət Baxçalı ölkələrimiz arasında dostluğun möhkəmləndirilməsində, elmin və təhsilin inkişafında xidmətlərinə görə, elmi şuranın 6 may tarixli qərarı ilə universitetin fəxri doktoru adına layiq görülmüşdür.

Sonra Dövlət Baxçalıya fəxri doktor diplomu, medalı, mantiyası təqdim edildi. Qonağa “BDU-nun dünya şöhrətli məzunu Heydər Əliyev” kitabı və xalça da hədiyyə olundu.

Mərasimdə akademik Fuad Qasımzadə, tarix fakultəsinin dekanı, Milli Məclisin deputatı, professor Yaqub Mahmudov, Türkiyə-Azərbaycan dostluq cəmiyyətinin həmsədri, 1V kurs tələbəsi Ökkeş Karaquş da çıxış etdilər.

Türkiyə Respublikası baş nazirinin müavini Dövlət Baxçalı bu yüksək şərəfə layiq görüldüyü üçün BDU-nun elmi şurasına minnətdarlığını bildirərək dedi ki, Türkiyə-Azərbaycan münasibətlərinin, o cümlədən təhsil sahəsində əməkdaşlığın dərinləşməsində səylərini əsirgəməyəcəkdir. O, əmin olduğunu bildirdi ki, qardaş ölkələrimizin gəncləri türk dünyasının aydın gələcəyi üçün daha böyük səylə çalışacaqlar.

Ermənistan -Azərbaycan, Daglıq Qarabağ münaqişəsinin həll olunmamasının müstəqil Azərbaycanın inkişafında böyük əngəl olduğunu vurğulayan natiq onu da bildirdi ki, bu münaqişə həll edilməyincə, Türkiyənin Ermənistanla iqtisadi, sosial, siyasi sahələrdə heç bir əlaqəsi ola bilməz. İşğal edilmiş torpaqlar azad olunmalı, Azərbaycanın ərazi bütövlüyü, sərhədlərinin toxunulmazlığı təmin edilməlidir.

Mərasimdə Azərbaycanın təhsil naziri Misir Mərdanov, Prezidentin İcra Aparatının humanitar siyasət şöbəsinin midiri Fatma Abdullazadə, Türkiyənin Bakıdakı səfiri Əhməd Ünal Çeviköz, Azərbaycanın Ankaradakı səfiri Məmməd Əliyev və digər rəsmi şəxslər iştirak edirdilər.

AZƏRBAYCAN PAYTAXTI İLƏ TANIŞLIQ

Türkiyə Respublikası baş nazirinin müavini, dövlət naziri Dövlət Baxçalı mayın 7-də günorta Azərbaycan paytaxtı ilə tanış olmuşdur.

Hörmətli qonaq şəhərin dağüstü hissəsində akademiya şəhərciyinin yerləşdiyi rayonla tanışlıqdan sonra İdman-Konsert Kompleksinə gəldi. Ona bu nəhəng kompleksdə son vaxtlar görülmüş yenidənqurma işləri, bir neçə gün əvvəl keçirilmiş sərbəst güləş üzrə 45-ci Avropa çempionatı, Azərbaycan və Türkiyə idmançılarının uğurlu çıxışları barədə məlumat verildi.

Daha sonra cənab D.Baxçalı dənizkənarı Milli parkı gəzdi, Xəzəri seyr etdi, Bakı metropoliteninin “Nizami” stansiyasında Azərbaycanın görkəmli fırça ustası, xalq rəssamı Mikayıl Abdullayevin dahi şairin “Xəmsəsi” mövzusunda verdiyi tərtibatla - rəngarəng pannolarla maraqla tanış oldu.

Paytaxtla tanışlıq zamanı hörmətli qonağı Bakı Şəhər İcra hakimiyyətinin başçısı Hacıbala Abutalıbov müşayiət edirdi.

AXISKA TÜRKLƏRİ İLƏ GÖRÜŞ

Mayın 7-də Türkiyə baş nazirinin müavini, dövlət naziri Dövlət Baxçalı onun üçün ayrılmış iqamətgahda Axıska türklərinin nümayəndələri ilə görüşmüşdür. 

Axıska türklərinin “Vətən” cəmiyyətinin sədri Xalid Taştan uzun illər həsrətində olduqları doğma vətənlərinə qayıtmaq arzularını bildirdilər.

Cənab Dövlət Baxçalı doğma yerlərindən deportasiya olunmuş və hazırda Azərbaycanda yaşayan yüz mindən artıq Axıska türkünün vətənlərinə dönmələri üçün beynəlxalq təşkilatlarla danışıqlar aparıldığını və bu sahədə xeyli iş görüldüyünü bildirdi.

X X X

Həmin gün Azərbaycan Prezidenti Heydər Əliyev ilə Türkiyə baş nazirinin müavini, dövlət naziri Dövlət Baxçalı arasında təkbətək görüş olmuşdur.

Daha sonra isə görüş Prezident Heydər Əliyevin və baş nazirin müavini Dövlət Baxçalının iştirakı ilə geniş tərkibdə davam etdirildi.

Mayın 7-də axşam Azərbaycanın Prezidenti Heydər Əliyevin adından Türkiyə baş nazirinin müavini Dövlət Baxçalının şərəfinə ziyafət verildi.

AZƏRTAC

Foto Namiq Məmmədovundur