TÜRKİYƏ SİLAHLI QÜVVƏLƏRİ QURU QOŞUNLARI KOMANDANININ AZƏRBAYCANA SƏFƏRİ
Türkiyə Silahlı Qüvvələri quru qoşunlarının komandanı, ordu generalı Hilmi Özkök Azərbaycanın müdafiə naziri general-polkovnik Səfər Əbiyevin dəvəti ilə ölkəmizə səfərə gəlmişdir.
İyulun 10-da Müdafiə Nazirliyində Səfər Əbiyev ilə Hilmi Özkök arasında görüş oldu.
Görüşün sonunda Azərbaycanın müdafiə naziri, general-polkovnik Səfər Əbiyevə Türkiyə Silahlı Qüvvələrinin “Ləyaqət” medalı təqdim edildi. Türkiyə Silahlı Qüvvələri Baş Qərargahının rəisi, ordu generalı Hüseyn Kıvrıkoğlunun nazirin təltif olunması barədə əmri oxundu.
Türkiyə quru qoşunlarının komandanı Hilmi Özkök çıxış edərək bildirdi ki, Səfər Əbiyev bu yüksək mükafata qardaş xalqlarımız arasında dostluğun möhkəmləndirilməsinə şəxsi töhfəsinə görə layiq görülmüşdür.
Səfər Əbiyev yüksək mükafata görə təşəkkürünü bildirərək dedi ki, bu medala layiq görülməsi onun üçün böyük şərəfdir. Bu bütün Azərbaycan Ordusuna verilən yüksək qiymətdir. Azərbaycanın ağır günlərində Türkiyə həmişə bizimlə olmuşdur. Xalqımız türk əsgərlərinin Azərbaycan uğrunda tökdüyü qanları unutmayacaqdır.
Nazir ölkələrimizin silahlı qüvvələri arasındakı əməkdaşlıqdan da danışaraq bildirdi ki, Azərbaycan Ordusu dünyanın ən qüdrətli ordularından biri olan Türkiyə Ordusundan nümunə götürür.
Bölmənin digər xəbərləri
