TÜRKİYƏ UNİVERSİTETLƏRİNƏ QƏBUL OLUNMUŞ ABİTURİYENTLƏRİN SİYAHISI AÇIQLANMIŞDIR
Tələbə Qəbulu üzrə Dövlət Komissiyasına (TQDK) 2008/2009-cu tədris ili üçün Türkiyə universitetlərinə qəbul edilmiş Azərbaycan vətəndaşlarının siyahısı daxil olmuşdur.
TQDK-dan AZƏRTAC-a bildirmişlər ki, qəbul olunmuş abituriyentlərin siyahısı bu qurumun internet saytında verilmiş və “Xalq qəzeti”nin 30 may 2008-ci il tarixli nömrəsində dərc edilmişdir.
Qəbul olunmuş abituriyentlər sənədləri ilə birlikdə 2008-ci il iyunun 2-dən 22-dək Azərbaycan Respublikası Təhsil Nazirliyinə müraciət etməlidirlər (ünvan: Bakı şəhəri, Xətai prospekti, 49).
Cari ildə Türkiyə universitetlərində Azərbaycan vətəndaşlarına 37 yer ayrılmışdı. Həmin yerlərə qəbul olunan azərbaycanlı gənclərdən 18 nəfəri türk dilindən müvəffəqiyyətlə imtahan verdiyinə görə bir illik türk dili kursunda təhsil almadan birbaşa daxil olduqları universitetin birinci kursunda oxuyacaqdır.
Üç nəfər isə daxil olduqları universitetin birinci kursuna qəbul ediləcəklər. Lakin onlar türk dili üzrə biliklərini qısa zamanda artırmalıdırlar.
16 nəfər isə yalnız bir illik türk dili kursunda təhsil aldıqdan sonra daxil olduqları universitetin birinci kursuna qəbul ediləcəkdir.
Bölmənin digər xəbərləri
