Respublikamızda rəsmi səfərdə olan Türkiyə baş nazirinin müavini, dövlət naziri Dövlət Baxçalı mayın 8-də Azərbaycan Milli Elmlər Akademiyası \AMEA\ Rəyasət heyətinin binasında Atatürk Mərkəzinin əməkdaşları və türkoloqlarla görüşmüşdür. 

AMEA-nın prezidenti, akademik Mahmud Kərimov görüşü açaraq, hörmətli qonağı və onu müşayiət edən nümayəndə heyətinin üzvlərini salamladı, Azərbaycan dövlət müstəqilliyini əldə edəndən sonra qardaş Türkiyə ilə elm, mədəniyyət sahəsində də əlaqələrin günbəgün inkişaf etdiyini və genişləndiyini bildirdi.

Atatürk Mərkəzinin direktoru, Milli Məclisin deputatı, professor Nizami Cəfərov Türkiyənin tanınmış dövlət xadiminin ölkəmizə səfərinin böyük əhəmiyyəti olduğunu bildirdi. O, Azərbaycan dövlətçiliyinin ideoloji əsaslarının hazırlanmasında, milli, elmi və türkoloji düşüncənin inkişafında Prezident Heydər Əliyevin müstəsna xidmətlərini vurğuladı, Azərbaycan Prezidentinin sərəncamı ilə yaradılmış Atatürk Mərkəzinin fəaliyyətindən danışaraq bildirdi ki, bir neçə ay ərzində Atatürk haqqında Azərbaycanda ilk monoqrafiya çap etdirilmiş, bülletenlər buraxılmış, konfranslar keçirilmişdir. İndi Atatürk haqqında ensiklopediya hazırlanır və o, bütün türkdilli ölkələrə göndəriləcəkdir.

Türkiyənin baş nazirinin müavini Dövlət Baxçalı görüşdə çıxış edərək, ona və nümayəndə heyətinin üzvlərinə göstərilən ehtirama görə dərin təşəkkürünü bildirdi, dost və qardaş Azərbaycanın minlərlə elm adamının çalışdığı, ölkənin inkişafına önəmli xidmətlər göstərən AMEA ilə tanışlıqdan məmnun qaldığını söylədi. Hörmətli qonaq dedi ki, ötən illər ərzində Azərbaycanda görülən əhəmiyyətli işlər bizi sevindirir. Mühüm coğrafi-strateji mövqeyə malik olan Azərbaycan Avrasiyada sülhün və sabitliyin təminatçılarından biridir və yeni yüz ildə hər zaman ulduz kimi parlayacaqdır.

Azərbaycan ilə Türkiyənin elm adamları arasındakı işbirliyinin xalqlarımızın mənafeyinə xidmət etdiyini vurğulayan cənab Dövlət Baxçalı Prezident Heydər Əliyevin səyləri nəticəsində Azərbaycanda latın əlifbasının tətbiqini, Atatürk Mərkəzinin yaradılmasını və fəaliyyətini yüksək qiymətləndirdi və bütün türk dünyasının böyük öndəri Atatürkün ölkəmizdə sevgi ilə yad olunmasından qürur və sevinc duyduğunu bildirdi.

Sonra Türkiyə baş nazirinin müavini görüş iştirakçılarının çoxsaylı suallarına cavab verdi.

MƏCBURİ KÖÇKÜNLƏRLƏ GÖRÜŞ

Ölkəmizdə rəsmi səfərdə olan Türkiyə baş nazirinin müavini, dövlət naziri Dövlət Baxçalı mayın 8-də Səttarxan adına maşınqayırma zavodunun tikintisi yarımçıq qalmış inzibati binasında müvəqqəti məskunlaşan məcburi köçkünlərlə - Cəbrayıl, Zəngilan, Ağdam və Qubadlı rayonlarının sakinləri ilə görüşmüşdür.

Hörmətli qonaq soydaşlarımızın yaşadıqları ağır şəraitlə tanış olaraq bildirdi ki, Türkiyə həmişə Azərbaycanla birlikdədir, işğal altındakı bütün torpaqlar azad edilməyincə, məcburi köçkünlər öz doğma ocaqlarına qayıtmayınca Türkiyə-Ermənistan münasibətlərinin normallaşdırılmasından əsla söhbət gedə bilməz.

Görüşdə iştirak edən ölkəmizin baş nazirinin müavini, Dövlətqaçqınkomun sədri Əli Həsənov Ermənistan-Azərbaycan, Dağlıq Qarabağ münaqişəsinin tarixindən, torpaqlarımızın 20 faizinin ermənilər tərəfindən işğal olunması nəticəsində vətəndaşlarımızın qarşılaşdıqları çətinliklərdən danışdı. O bildirdi ki, bir çox proqramların həyata keçirilməsi dayandırıldığına görə, donor təşkilatların göstərdikləri yardım azalıb 45 milyon dollara enmişdir. Əli Həsənov məcburi köçkünlərə göstərdiyi daimi yardıma görə Türkiyə Qızıl Aypara Cəmiyyətinə təşəkkür etdi, eyni zamanda təəssüflə dedi ki, o da Azərbaycanda fəaliyyətini dayandırır.

Görüşdə çıxış edən məcburi köçkünlər bildirdilər ki, bu səfərə böyük əhəmiyyət verirlər, çünki münaqişənin aradan qaldırılması naminə Türkiyənin qüvvəsini əsirgəməyəcəyinə böyük ümid bəsləyirlər.

TÜRKİYƏ SƏFİRLİYİNDƏ MƏTBUAT KONFRANSI

Mayın 8-də Türkiyə baş nazirinin müavini Dövlət Baxçalı ölkəsinin Bakıdakı səfirliyində Azərbaycana rəsmi səfərinin yekunlarına dair mətbuat konfransı keçirmişdir.

Cənab Dövlət Baxçalı səfərə dəvətə, ona və başçılıq etdiyi nümayəndə heyətinə göstərilən qonaqpərvərliyə görə Prezident Heydər Əliyevə və Azərbaycan xalqına dərin minnətdarlığını bildirdi, Bakıda keçirdiyi görüşlərdən məmnun qaldığını və bu səfərin Türkiyə ilə Azərbaycan arasında dostluq və qardaşlıq münasibətlərinin daha da dərinləşməsinə xidmət etdiyini söylədi.

O, müstəqillik qazandıqdan sonra Azərbaycanda baş verən demokratik dəyişikliklərin, bütün sahələrdə aparılan islahatların sevindirici hal olduğunu vurğuladı. Hörmətli qonaq dedi ki, Azərbaycanın əsas problemi olan Dağlıq Qarabağ münaqişəsinin həlli məsələsində Türkiyə hər zaman dost və qardaş Azərbaycanla birlikdədir və üzərinə düşən hər bir vəzifəni bundan sonra da yerinə yetirəcəkdir. Türkiyə Azərbaycanın müstəqilliyinin, ərazi bütövlüyünün və sərhədlərinin pozulmasını heç vaxt qəbul etməyəcəkdir.

Cənab Dövlət Baxçalı Bakı-Tbilisi-Ceyhan, Bakı-Tbilisi-Ərzurum neft və qaz kəmərləri layihələrinin gerçəkləşməsi sahəsində görülən işlər, öz ölkəsinin daxilində gedən siyasi proseslər barədə də məlumat verdi.

Sonra Türkiyənin baş nazirinin müavini jurnalistləri maraqlandıran sualları cavablandırdı.

TÜRKİYƏLİ İŞ ADAMLARI İLƏ GÖRÜŞ

Həmin gün Türkiyənin baş nazirinin müavini Dövlət Baxçalı “Həyat-park” mehmanxanasında öz ölkəsinin Azərbaycanda çalışan iş adamları ilə görüşmüşdür.

Cənab Dövlət Baxçalı görüşdə çıxış edərək, Azərbaycan ilə Türkiyə arasında iqtisadi əməkdaşlığın yüksək səviyyədə olduğunu söylədi, eyni zamanda vurğuladı ki, indi əsas məqsəd bu əlaqələri daha da genişləndirməkdən ibarətdir. O, Türkiyənin iş adamlarının respublikamızdakı fəaliyyəti, problemləri ilə maraqlandı, məsləhət və tövsiyələrini bildirdi.

Qardaş ölkənin iş adamları belə görüşlərin əhəmiyyətini vurğulayaraq, çalışdıqları sahələr üzrə məlumatlar verdilər, Türkiyə-Azərbaycan iqtisadi işbirliyinin daha da dərinləşməsi ilə bağlı təkliflərini söylədilər.