TÜRKMƏNİSTAN PREZİDENTİ AZƏRBAYCAN DÖVLƏT NEFT ŞİRKƏTİNİN PREZİDENTİ İLƏ GÖRÜŞMÜŞDÜR
AZƏRTAC-ın xüsusi müxbiri xəbər verir ki, iyunun 19-da Türkmənistan Prezidenti Qurbanqulu Berdiməhəmmədov bu ölkədə səfərdə olan Azərbaycan Dövlət Neft Şirkətinin prezidenti Rövnəq Abdullayevi qəbul etmişdir.
Azərbaycan tərəfinin Türkmənistanla uzunmüddətli əməkdaşlığın yaradılmasında böyük marağı olduğunu qeyd edən Rövnəq Abdullayev bildirmişdir ki, Türkmənistanın dövlət başçısının Azərbaycana bu yaxınlarda olan rəsmi səfəri, yüksək səviyyədə aparılan danışıqların mühüm nəticələri ölkələrimiz arasında bütün istiqamətlərdə, o cümlədən yanacaq-energetika sahəsində əlaqələrin dərinləşməsinə təkan vermişdir. Qonaq bu ilin payızında dünyanın iri şirkətlərinin, beynəlxalq maliyyə və sərmayə strukturlarının iştirakı ilə Bakıda keçiriləcək “Türkmənistanın və Azərbaycanın neft və qazı” adlı beynəlxalq konfransın böyük əhəmiyyətindən danışmışdır.
Görüşdə tərəflər külli miqdarda karbohidrogen ehtiyatlarına malik iki qonşu dövlətin maraq dairəsində olan qarşılıqlı faydalı əməkdaşlığın perspektiv istiqamətləri və imkanları haqqında fikir mübadiləsi aparmışlar. Söhbətdə Xəzər dənizində qarşılıqlı fəaliyyət məsələlərinə də toxunulmuşdur.
Bölmənin digər xəbərləri
