Ukrayna Avropa İttifaqının tələb etdiyi Antikorrupsiya Məhkəməsini yaxın aylarda yaradacaq
Kiyev, 12 mart, AZƏRTAC
Ukraynanın Baş naziri Vladimir Qroysman ölkədə Antikorrupsiya Məhkəməsinin yaxın aylarda yaradılacağına inandığını deyib.
AZƏRTAC xəbər verir ki, bu barədə Qroysman Avropa İttifaqının xarici siyasət və təhlükəsizlik məsələləri üzrə ali nümayəndəsi Federika Moqerini ilə Kiyevdə keçirdiyi birgə brifinqdə məlumat verib.
“Ukraynanın Baş naziri kimi mən və bütövlükdə hökumət Antikorrupsiya Məhkəməsinin yaradılmasını tam dəstəkləyirik. Ali Rada hazırda bu məsələyə baxır”, - deyə Qroysman əlavə edib.
Qeyd edək ki, Moqerini Ukraynaya səfəri çərçivəsində yerli mətbuata müsahibəsində bəzi islahatların Avropa İttifaqının arzuladığı kimi getmədiyini açıqlayıb. Bildirib ki, Ukrayna korrupsiya ilə bağlı islahatları intensivləşdirməli və bununla bağlı qanun Venesiya Komissiyasının rəyi əsasında qəbul edilməlidir.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
