SİYASƏT
Ülviyyə Ağayeva: Prezident İlham Əliyevin siyasi fəaliyyətinin təsir dairəsi yalnız Azərbaycanı deyil, bütün regionu əhatə edir
Bakı, 20 dekabr, AZƏRTAC
Hər hansı ölkənin beynəlxalq münasibətlər sistemində tutduğu mövqeyi, malik olduğu nüfuz və statusu bilavasitə həmin ölkənin liderindən, onun apardığı siyasətdən asılıdır. Çünki dövlət başçısı ölkənin beynəlxalq aləmdəki təmsilçisidir. Bu baxımdan, hazırda Azərbaycanın dünya dövlətləri arasında tutduğu layiqli mövqe, malik olduğu yüksək status Prezident İlham Əliyevin apardığı xarici siyasətin nəticəsidir.
Bunu AZƏRTAC-a açıqlamasında Milli Məclisin deputatı Ülviyyə Ağayeva bildirib.
Deputat deyib: “Ulu Öndər tərəfindən əsası qoyulmuş, ölkəmizin maraqlarına cavab verən və tam müstəqil siyasi xəttin Prezident İlham Əliyev tərəfindən uğurla davam etdirilməsi Azərbaycanın beynəlxalq münasibətlər sistemində söz sahibi olmasına, mövqeyinin möhkəmlənməsinə, nüfuzunun davamlı şəkildə artmasına səbəb olub.
Dövlətimizin başçısının apardığı xarici siyasət həm regional, həm də qlobal əhəmiyyət daşıması ilə seçilir. Azərbaycan Cənubi Qafqazın lider dövləti olmaqla yanaşı, Avropa ilə Asiyanı siyasi, iqtisadi və mədəni cəhətdən birləşdirən regional güc mərkəzinə çevrilib. Təsadüfi deyil ki, bu gün Azərbaycanın həyata keçirdiyi müstəqil siyasət dünya miqyaslı siyasi-iqtisadi proseslərin gedişatına həlledici təsir göstərə bilir.
Prezident İlham Əliyev ölkəmizin xarici siyasət xəttini belə dəyərləndirir: “Bu siyasət Azərbaycan xalqının milli maraqlarını hər şeydən üstün tutur. Azərbaycan heç bir xarici qüvvənin diktəsi ilə oturub-durmur, müstəqil siyasət aparır və sürətlə inkişaf edir, eyni zamanda, sübut edir ki, bu gün müsəlman aləmində dinamik, müasir, öz milli-mənəvi dəyərlərinə sadiq, güclü bir dövlət vardır”.
Heç kəsə sirr deyil ki, apardığı müdrik siyasətlə Azərbaycanı qüdrətli bir dövlətə çevirmiş Prezident İlham Əliyevin bu illər ərzində əsas hədəfi erməni işğalına son qoymaq idi. Böyük siyasi lider buna çox uğurla nail oldu. Ölkəmizin Vətən müharibəsində qazandığı möhtəşəm Qələbə şübhəsiz ki, bu düşünülmüş siyasətin layiqli nəticəsidir”.
Deputat qeyd edib ki, Vətən müharibəsi ərzində Prezident İlham Əliyev təkcə səngərdə deyil, eyni zamanda, informasiya cəbhəsində aparılan müharibənin Ali Baş Komandanı idi. Dövlətimizin başçısı verdiyi bəyanatlarla Azərbaycanın haqq səsini dünya mediasına və dünya birliyinə çatdırdı və bununla siyasi müstəvidə aparılan müharibənin də qalibi oldu.
Ülviyyə Ağayeva bildirib ki, bütün dünyada olduqca gərgin və ziddiyyətli proseslərin getdiyi, ciddi geosiyasi savaşların baş verdiyi bir dövrdə beynəlxalq aləmdə söz sahibi olmaq, ölkəni dinamik şəkildə inkişaf etdirmək, dünya dövlətlərinin Azərbaycanla hesablaşmasına nail olmaq və bütün bunların nəticəsi olaraq, otuz ilə yaxın müddətdə düşmən işğalı altında qalmış torpaqları azad etmək, əlbəttə ki, misilsiz tarixi nailiyyətdir.
“Görkəmli siyasi xadim olan Prezident İlham Əliyev irəli sürdüyü qlobal təşəbbüsləri ilə də daim seçilir. Bu, onu göstərir ki, dövlətimizin başçısının siyasi fəaliyyətinin təsir dairəsi yalnız Azərbaycanı deyil, bütün regionu əhatə edir.
2019-cu ildə Azərbaycanın Qoşulmama Hərəkatının sədri seçilməsi nəticəsində Prezident İlham Əliyevin təşəbbüskarlığı daha qlobal xarakter aldı. Böyük siyasi lider olan dövlətimizin başçısı İlham Əliyevin irəli sürdüyü təşəbbüslər, qarşıya qoyduğu məqsədlər və atdığı mühüm praktik addımlar sayəsində bu təsisat son illərlə müqayisədə ən qüdrətli dövrünü yaşayır.
Prezident İlham Əliyevin qlobal təşəbbüskarlığı dünyanın ciddi bir böhranla - pandemiya ilə üz-üzə qaldığı bir zamanda özünü daha qabarıq büruzə verdi. Koronavirus pandemiyasının müşahidə edildiyi ilk zamanlardan etibarən Azərbaycan Prezidenti tərəfindən dünya əhəmiyyətli təşəbbüslər irəli sürülüb, beynəlxalq səviyyədə bütün resursların səfərbər olunması zərurəti dünya ictimaiyyətinə bəyan edilib. Dövlətimizin başçısı COVID-19-a qarşı mübarizədə qlobal həmrəyliyin təcəssümü kimi Ümumdünya Səhiyyə Təşkilatına ianə ayırıb, 30-dan artıq dövlətə humanitar yardım göstərib.
2020-ci ilin aprel ayında Prezident İlham Əliyevin təşəbbüsü ilə Türk Şurasının koronavirusla mübarizəyə həsr edilmiş Zirvə Görüşü keçirilib. Qeyd etmək lazımdır ki, Türk Şurası COVID-19 pandemiyasına qarşı mübarizəyə həsr olunmuş Zirvə Görüşü keçirən ilk beynəlxalq təşkilat olub. Eyni zamanda, İlham Əliyev “peyvənd millətçiliyi”nə qarşı qlobal mübarizə aparıb, Qoşulmama Hərəkatı adından peyvəndlərə bərabər və universal çıxışın təmin edilməsi ilə bağlı BMT Baş Assambleyasında qətnamə irəli sürüb, 170-dən çox ölkə bu qətnamənin lehinə səs verib.
Beləliklə, Prezident İlham Əliyev 2003-cü ildə qarşıya qoyduğu strateji hədəflərə çatmaq üçün istər beynəlxalq səviyyədə, istər regional səviyyədə, istərsə də ölkə daxilində məqsədyönlü və düşünülmüş siyasət həyata keçirərək Azərbaycanın dünya miqyasında aparıcı ölkə kimi qəbul edilməsinə nail oldu”, - deyə deputat vurğulayıb.