SİYASƏT
Ümummilli lider Heydər Əliyevin anadan olmasının 97-ci ildönümü Parisdə virtual konsertlə qeyd edilib VİDEO
![](/files/galleryphoto/2020/2/1200x630/15891454972951650984_1200x630.jpg)
![](/files/galleryphoto/2020/2/1200x630/15891454971339040067_1200x630.jpg)
![](/files/galleryphoto/2020/2/1200x630/15891454973163553204_1200x630.jpg)
![](/files/galleryphoto/2020/2/1200x630/15891454973944325448_1200x630.jpg)
Paris, 11 may, AZƏRTAC
Ümummilli lider Heydər Əliyevin anadan olmasının 97-ci il dönümü Fransadakı səfirliyimiz tərəfindən virtual konsertlə qeyd edilib.
Azərbaycan xalqının milli azadlıq və istiqlaliyyət tarixinin xilaskarı, öz qətiyyəti ilə xalqımızı arxasınca aparmış və ən ağır vaxtlarda, taleyüklü məqamlarda xalqın yanında olmuş ulu öndər Heydər Əliyevin anadan olmasının 97-ci ildönümüdür. Ümummilli lider Heydər Əliyev müasir dünya tarixində silinməz iz qoyan böyük şəxsiyyətlərdəndir.
AZƏRTAC xəbər verir ki, bu fikirləri Fransadakı səfirimiz Rəhman Mustafayev ümummilli lider Heydər Əliyevin anadan olmasının 97-ci ildönümü qeyd edilərkən söyləyib.
Bildirib ki, müstəsna xidmətləri ilə əbədiyaşarlıq qazanmış Ümummilli Liderin həyat yolu, zəngin və çoxşaxəli irsi hər birimiz üçün tükənməz mənbədir. Ötən illərə nəzər salanda, məhz müdrik liderin rəhbərliyi ilə Azərbaycan xalqının ən çətin anlardan çıxaraq, qazandığı böyük əhəmiyyətli tarixi nailiyyətləri görürük. Heydər Əliyev Azərbaycan milli şüurunun oyanışında əvəzsiz rol oynamış və onun sayəsində müstəqilliyimiz əbədi və dönməz xarakter alıb. Azərbaycan balanslaşdırılmış xarici siyasət aparıb, beynəlxalq səhnədə layiq olduğu yeri tutub.
“Məhz Heydər Əliyevin Azərbaycana rəhbərlik etdiyi illərdə müasir dövlət müstəqilliyimizin möhkəm təməli qoyulub, milli ruh, azərbaycançılıq məfkurəsi yüksəlib. Ötən əsrin əvvəlləri kimi, sonları da Azərbaycan üçün mürəkkəb və ziddiyyətli, dinamik və taleyüklü proseslərlə səciyyələnən zəngin dövlət quruculuğu dövrü kimi tarixə qovuşub. Heydər Əliyev ölkəmizin parçalanmaq təhlükəsi ilə üzləşdiyi çətin vaxtda hakimiyyətə gəlib, müdrik siyasəti ilə ölkəni çətin vəziyyətdən çıxarıb, onu daha da möhkəmləndirib. Təsadüfi deyil ki, fransız siyasətçiləri həmişə Heydər Əliyevi Şarl dö Qolla müqayisə edərək, bu iki nəhəng siyasətçinin ölkələrinin ən mürəkkəb dövründə xalqın çağırışı ilə hakimiyyətə qayıdışından danışırlar”, -deyə R. Mustafayev vurğulayıb.
Qeyd edib ki, illər keçdikcə, Azərbaycan xalqının dahilik rəmzi olan Heydər Əliyevin dövlət, millət qarşısında tarixi xidmətləri daha aydın görünür. Heydər Əliyev rəhbərliyinin bütün dövrlərində daim tərəqqisi üçün çalışdığı, zəngin mədəniyyəti, böyük tarixi keçmişi ilə həmişə qürur duyduğu və gələcək nəsillərin taleyi üçün düşündüyü doğma yurdu Azərbaycanı bir dövlət kimi zamanın ağır və sərt sınaqlarından çıxarıb. Siyasi və dövlət xadimi, hələ sağlığında canlı əfsanəyə çevrilmiş Heydər Əliyev fenomeni həmişə diqqətləri cəlb edib, onun siyasi fəaliyyəti milli və beynəlxalq miqyasda dərin kök atıb.
Diplomat qeyd edib ki, bütün ölkədaxili, regional və coğrafi-siyasi maneələrə baxmayaraq, Azərbaycan dövlət quruculuğu və iqtisadi inkişaf sahəsində böyük nailiyyətlər əldə etmişdir. Məhz Heydər Əliyevin hakimiyyəti dövründə ölkədə siyasi plüralizm yaranıb, cəmiyyət əsl demokratik inkişaf yoluna çıxıb.
Bu gün dünya ölkələrinin qlobal çağırışla üzləşdiyini deyən səfir bildirib ki, dünya ölkələri ümumi bir bəlaya-virusa qarşı mübarizədə səfərbər olub. Mövcud vəziyyətlə əlaqədar Ümummilli Liderin ad günü fərqli formatda qeyd olunur: “Mövcud epidemiya ilə bağlı toplaşmaq qadağandır və buna görə virtual formata üstünlük verdik. İnanırıq ki, təşkil etdiyimiz virtual tədbirə daha çox insan qoşulacaq və bizimlə bərabər Ulu Öndərin xatirəsini yad edəcəklər”.
Sonra Paris “École normale de musique de Paris-Alfred-Cortot” ali musiqi məktəbinin tələbələri- Xalq şairi Səməd Vurğunun nəticəsi, istedadlı pianoçu Vurğun Vəkilov və gənc fleytaçı Ağarəhim Quliyevin iştirakı ilə Ulu Öndərin xatirəsinə həsr edilmiş virtual konsert olub.
Konsertdən əvvəl gənc musiqiçilər virtual auditoriyaya müraciət ediblər: “Bu gün Azərbaycanın müasir tarixində, siyasi və iqtisadi həyatında mühüm rol oynamış, ümummilli liderimiz Heydər Əliyevin anadan olmasının 97-ci ildönümünü qeyd edirik. Fransada karantin rejimində olduğu üçün Parisdə səfirliyimizin Mədəniyyət Mərkəzindən birbaşa yayımla Ümummilli Liderin sevdiyi Azərbaycan xalq mahnıları və bəstəkarlarının mahnılarını səsləndirəcəyik”.
Gənc musiqiçilər Azərbaycan xalq mahnıları, eləcə də Qara Qarayev, Tofik Quliyev, Arif Məlikov və Emil Əfrasiyab kimi bəstəkarlarımızın əsərlərini ifa ediblər. Heydər Əliyevin çox sevdiyi “Küçələrə su səpmişəm” mahnısı ilə virtual konsert başa çatıb.
Şəhla Ağalarova
AZƏRTAC-ın xüsusi müxbiri
Paris