“UNİLEASİNG”İN DÖRD YAŞI TAMAM OLMUŞDUR
Azərbaycanın ən böyük lizinq şirkəti olan “Unileasing” Qapalı Səhmdar Cəmiyyətinin yarandığı gündən dörd il keçir.
Şirkətdən AZƏRTAC-ın müxbirinə bildirmişlər ki, bu müddət ərzində “Unileasing” şirkəti 626 kontrakt imzalamışdır. Həmin kontraktlara əsasən ümumi məbləği 53 milyon dollardan çox olan 1238 obyekt lizinqə verilmişdir.
Şirkətin təklif etdiyi lizinq obyektlərinin maliyyələşmə şərtləri bu gün də bazarda ən sərfəli sayılır. Məsələn, New Holland layihəsi çərçivəsində müasir tikinti texnikasını lizinqlə illik 16 faizlə almaq mümkündür. Bununla yanaşı, müştəri “ISUZU” və “Mitsubishi” markalı avtomobilləri onların dəyərinin cəmi 10 faizini ödəməklə, illik 18-19 faiz lizinqlə əldə edir. “Kommersiya daşınmaz əmlakı lizinqi” və “Avtolizinq” layihələri çərçivəsində müraciətlərin sayı isə ilin əvvəlindən 100 faizdən çox artmış və bu artım meyli hazırda da müşahidə olunmaqdadır.
“Unileasing” qiymətli kağızların emissiyası hesabına maliyyəni cəlbetmə mexanizmindən istifadəyə başlamış ilk yerli şirkətlərdən biridir. Şirkət 2005-ci ilin avqustunda uzunmüddətli borc öhdəliklərini dövriyyəyə buraxaraq, veksel müraciəti və uzunmüddətli maliyyə bazarının tamhüquqlu üzvünə çevrilmişdir. 2006-2007-ci illərdə Azərbaycan Respublikası Prezidenti yanında Qiymətli Kağızlar üzrə Dövlət Komitəsində (QKDK) səhmin emissiyası və şirkətin istiqrazları qeydiyyyata alınmışdır. Lizinq əməliyyatlarını maliyyələşdirmək üçün əlavə resurslar cəlb etmək məqsədi ilə “Unileasing” bu ilin iyununda QKDK-da 1,8 milyon manat məbləğində faizli sənədsiz adlı istiqrazların emissiyası prospektini qeydiyyatdan keçirmişdir.
Şirkətin etibarlı olduğunu Avropanın aparıcı maliyyə təsisatçısı olan Avropa Yenidənqurma və İnkişaf Bankı (AYİB) təsdiq etmişdir. “Unileasing” QSC Azərbaycanda səhmdarı AYİB olan yeganə lizinq şirkətidir. “Unileasing” həm də Avropa Bankının kredit xətti açdığı yeganə şirkətdir. Şirkətin lizinq əməliyyatlarını maliyyələşdirmək üçün Beynəlxalq Maliyyə Korporasiyasının (İFC), Rayffayzenbankın, İslam Özəl Sektorun İnkişafı Korporasiyasının (ICD) və digər maliyyə qurumlarının resursları cəlb olunmuşdur. Bundan əlavə, şirkət yerli sahibkarların müxtəlif layihələrini maliyyələşdirməyə vəsait cəlb etmək üçün hazırda müxtəlif maliyyə təsisatları, o cümlədən ABŞ və Türkiyənin “Eximbank”ı, habelə Yaponiyanın kommersiya bankları ilə danışıqlar aparır.
“Unileasing” bölgələrdə öz nümayəndəliyi olan yeganə yerli lizinq şirkəti olaraq qalmaqdadır. Hazırda şirkətin bölmələri Gəncə, Lənkəran, Quba və Şəkidə fəaliyyət göstərir. Bundan əlavə, yaxın vaxtlarda “Unileasing”in Aran iqtisadi zonasında da nümayəndəliyi açılacaqdır.
“Unileasing” fəaliyyət göstərdiyi 4 il ərzində öz xidmət paketini Azərbaycan bazarı üçün yeni olan xidmətlərlə xeyli genişləndirmiş, bazara ilk dəfə kommersiya daşınmaz əmlak lizinqi, islam prinsiplərinə əsaslanan lizinq, fiziki şəxslər üçün dəyərin 10 faizi məbləğində avtolizinq təklif etmişdir. Sahibkarlardan və fiziki şəxslərdən başqa, bir neçə yerli bank da şirkətin müştərisi olmuşdur. Lizinqin üstünlüklərindən istifadə etmək istəyən maliyyə təşkilatlarının sayı isə artmaqdadır. Lakin əldə olunmuş nailiyyətlərlə kifayətlənməyən “Unileasing” təklif etdiyi xidmətləri daim təkmilləşdirir, ənənəvi yanaşmalarla innovasiya yanaşmalarını məharətlə uyğunlaşdırır və lizinq obyektlərinin maliyyələşdirilməsi ilə bağlı problemlərin kompleks həllini təklif edir.
