CƏMİYYƏT
Uşaqları Beynəlxalq Müdafiə Günü qeyd edilmişdir
Bakı, 29 may (AZƏRTAC, Nihat Budaqov). Mayın 29-da Yeni Azərbaycan Partiyası (YAP) Nizami rayon təşkilatının gənclər birliyinin və “Qayğı-Sağlam Nəsil Naminə” İctimai Birliyinin birgə təşkilatçılığı ilə 1 iyun - Uşaqları Beynəlxalq Müdafiə Gününə həsr olunmuş tədbir keçirilmişdir.
AZƏRTAC xəbər verir ki, tədbirdə çıxış edən YAP Nizami rayon təşkilatının Gənclər Birliyinin idarə heyətinin üzvü və “Qayğı-Sağlam Nəsil Naminə” İctimai Birliyinin təsisçisi Sevinc Abdullayeva bayram münasibətilə uşaqları təbrik etmiş, dövlətimizin yetişməkdə olan nəslə göstərdiyi diqqət və qayğıdan söhbət açmışdır.
Bildirilmişdir ki, dövlətimizin başçısı İlham Əliyevin və Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri Mehriban Əliyevanın məqsədyönlü fəaliyyətləri nəticəsində ölkəmizdə uşaqların sağlam həyat tərzi və hərtərəfli inkişafı naminə uğurlu addımlar atılmış, bu sahəyə diqqət və qayğı artırılmışdır.
Nizami Rayon İcra Hakimiyyəti başçısının müavini Gülnaz İsrafilova ölkəmizdə uşaqlara göstərilən hərtərəfli dövlət qayğısından danışmışdır.
Tədbirdə Nizami Rayon Uşaq və Yeniyetmələrin Yaradıcılıq Mərkəzinin kollektivi qayğı uşaq reabilitasiya və daun sindromlu şəxslərin reabilitasiya mərkəzlərinin uşaqları üçün müxtəlif rəqslər, ifalarla çıxış etmişlər. Uşaqlar üçün müxtəlif oyunlar təşkil olunmuş, şən klounların iştirakına yer verilmişdir.
Sonda uşaqlara hədiyyələr təqdim edilmişdir.