VERGİLƏR NAZİRLİYİNDƏ GENİŞ KOLLEGİYA İCLASI KEÇİRİLMİŞDİR
Nazir Fazil Məmmədov iclası açaraq demişdir ki, son on ildə Prezident Heydər Əliyevin rəhbərliyi altında ölkəmizdə daxili ictimai-siyasi sabitlik yaradılmış, bütün sahələrdə, o cümlədən iqtisadiyyatda islahatlar aparılmış, demokratik prinsiplər, qanunun aliliyi bərqərar olunmuş, uğurlu nəticələr əldə edilmişdir. Bunlara baxmayaraq, müxalifət mətbuatında dövlətimizin başçısı haqqında milli dəyərlərə, azərbaycançılığa zidd olan, ümumiyyətlə, insanlığa yaraşmayan xəbərlər, məqalələr dərc edilir, şayiələr yayılır.
Rəhbərlik etdiyi nazirliyin siyasi məsələlərlə məşğul olmadığını, lakin əməkdaşların bir vətəndaş kimi bəzi məsələlərə öz mövqeyini bildirməsinin zəruriliyini vurğulayan Fazil Məmmədov vurğulamışdır ki, bəzi müxalifət qüvvələri istədiyinə nail olmaq üçün bütün milli dəyərləri tapdalamağa hazırdır. Onlar üçün ali, müqəddəs heç nə yoxdur. Vaxtilə hakimiyyətdə olmuş bu adamlar xalqımızın başına min bir bəla gətirmişlər. İndi dərc olunan əxlaqsız məqalələr onların xislətini, mənəviyyatsızlığını göstərir.
Nazir vergi işçilərinin qarşısında duran vəzifələrə də toxunaraq demişdir ki, onlar daha məsuliyyətli olmalı, prezidentimizin göstərişlərini, dövlətimizin vergi siyasətini uğurla həyata keçirməlidirlər.
Nazirliyin vergi siyasəti və strateji araşdırmalar idarəsinin rəisi Akif Musayev, nazirin müşaviri Sevda Məmmədova, Vergilər Nazirliyi yanında İri Vergi ödəyiciləri ilə iş departamentinin rəisi Sahir Məmmədov, Bakı Şəhər Vergilər İdarəsinin rəisi Eldar Şahbazov çıxış edərək bütün həyatını xalqa həsr edən, müstəqil dövlətçiliyimizin memarı Prezident Heydər Əliyev haqqında iftira kampaniyası aparan bu cür insanlara qarşı qəti tədbirlərin görülməsinin və onların cəzalandırılmasının vacibliyini vurğulamışlar. Bildirilmişdir ki, qarşıdan gələn prezident seçkilərində bütün Azərbaycan xalqı kimi, vergi orqanlarında calışanlar da dünya şöhrətli siyasətçi, xalqımızın xilaskarı və lideri Heydər Əliyevin namizədliyini dəstəkləyəcəklər.
Sonra Nazirliyin İqtisadi Təhlil və Uçotun Təşkili İdarəsinin rəisi Şahin Mustafayev gündəlikdəki məsələ barədə məruzə etmişdir. O bildirmişdir ki, ilin birinci yarısında 1848,2 milyard manat proqnoza qarşı dövlət büdcəsinə 1935,7 milyard manat vəsait daxil olmuş, proqnoza 104,7 faiz əməl edilmişdir. Bu ilin ikinci rübündə 995,2 milyard manata qarşı 1016,2 milyard manat daxil edilmiş, proqnoza 102,1 faiz əməl olunmuşdur. O cümlədən iyun ayında proqnoz 134,9 faiz yerinə yetirilmişdir.
2003-cü ilin birinci yarımilliyində Vergilər Nazirliyi tərəfindən yığılması təmin edilmiş vergilərin ümumi daxili məhsulda xüsusi çəkisi 12,56 faiz təşkil etmişdir. Daxilolmalar ötən ilin müvafiq dövrü ilə müqayisədə 446,1 milyard manat və ya 29,9 faiz, o cümlədən Dövlət Neft Şirkəti üzrə 296,9 milyard manat və ya 46,4 faiz, qeyri-neft sektoru üzrə 149,2 milyard manat və ya 17,5 faiz artmışdır.
Dövlət müəssisələrindən büdcəyə 1131,6 milyard manat əvəzinə 1164,8 milyard manat daxil olmuşdur ki, bu da keçən ilin müvafiq dövründəkindən 330 milyard manat çoxdur. Qeyri-dövlət müəssisələrindən daxil olan vəsait isə proqnozda nəzərdə tutulan 716,6 milyard manata qarşı 770,9 milyard manat olmuşdur. Bu, 2002-ci ilin müvafiq dövrü ilə müqayisədə 116,1 milyard manat artıqdır.
Əlavə dəyər vergisi (599,3 milyard manat), aksiz vergisi üzrə (164,5 milyard manat), mənfəət vergisi üzrə (415,7 milyard manat), fiziki şəxslərdən gəlir vergisi (320,5 milyard manat) və digər vergi və rüsumlar üzrə proqnozlara da artıqlaması ilə əməl edilmişdir.
Nazir Fazil Məmmədov iclasa yekun vurmuş, müzakirə edilən məsələyə dair müvafiq qərar qəbul olunmuşdur.
Bölmənin digər xəbərləri
