“Xaçmaz” qəzetinin 80 illik yubileyi qeyd edilmişdir
Xaçmaz, 20 iyul (AZƏRTAC). İyulun 20-də Xaçmaz mədəniyyət evində “Xaçmaz” qəzetinin 80 illik yubileyi ilə əlaqədar tədbir keçirilmişdir.
Mərasimdə rayon rəhbərliyi, ictimaiyyətin nümayəndələri, bölgədə fəaliyyət göstərən yerli qəzetlərin əməkdaşları iştirak etmişlər.
AZƏRTAC xəbər verir ki, tədbir iştirakçıları əvvəlcə ulu öndər Heydər Əliyevin Xaçmaz şəhərindəki abidəsi önünə gül dəstəsi qoymuş, xatirəsini ehtiramla anmışlar.
Azərbaycan milli mətbuatının yaranmasının 137-ci ildönümü ərəfəsində keçirilən mərasimdə çıxış edənlər bildirmişlər ki, 1932-ci ıldə “Qırmızı Xaçmaz” adı ilə təsis olunan qəzet müxtəlif illərdə “Döyüş yolunda”, “Tərəvəzçi” , “Dostluq” adları ilə nəşr olunmuşdur. Qəzet öz sələflərinin davamçısı kimi 2002-ci ildən “Xaçmaz” adı ilə fəaliyyətini davam etdirmişdir.
Bildirilmişdir ki, rayonun ictimai-siyasi, iqtisadi, sosial və mədəni həyatını, yenilikləri oxuculara çatdıran qəzet böyük formatda ayda 2 dəfə olmaqla min nüsxə tirajla nəşr olunur. İnkişafa, işıqlı gələcəyə aparan ulu öndər Heydər Əliyev siyasətini təbliğ etməklə xalqa xidmət edən qəzet rayonun tarixini yaradır və yaşadır.
Tədbirdə ölkəmizdə mətbuatın inkişafına dövlət qayğısının əhəmiyyəti xüsusi vurğulanmışdır.
İştirakçılar qəzetin keçdiyi tarixi yolu işıqlandıran sərgi ilə tanış olmuşlar.
Bölmənin digər xəbərləri
