XALQ - HEYDƏR BİRLİYİNİ HEÇ BİR QÜVVƏ SARSIDA BİLMƏZ !
ZİYALILARININ, İCTİMAİ TƏŞKİLATLARININ
VƏ İCTİMAİYYƏT NÜMAYƏNDƏLƏRİNİN AZƏRTAC-A
GÖNDƏRDİKLƏRİ BƏYANATIN LEYTMOTİVİNİ
TƏŞKİL EDİR
Son günlər dağıdıcı müxalifət və onun mətbuat orqanları dövlət atributlarına, xüsusilə bütün ömrünü xalqımıza həsr edən möhtərəm Prezidentimiz Heydər Əliyevə qarşı heç bir əsası olmayan böhtan və şər kampaniyasına başlamışlar. Belə ki, onlar öz təsir dairələrində olan “Yeni Müsavat”, “Hürriyyət”, “Azadlıq” və digər qəzetlərdə ölkəmizin başçısının şəxsiyyəti və sağlamlıq durumu ilə bağlı yalan və qərəzli məlumatlar yayır və bununla da xalqı çaşdırmağa çalışırlar. Amma onlar unudurlar ki, artıq xalq kimin kim olduğunu yaxşı bilir. Ötən 34 il ərzində zamanın ağır sınaqlarından çıxmış böyük Xalq - Heydər birliyi formalaşmışdır. Heç bir qüvvə bu birliyi sarsıda bilməz.
Ölkəmizin hər yerində olduğu kimi, Şamaxı rayonunda da son vaxtlar dağıdıcı müxalifətin və onun mətbuat orqanlarının möhtərəm Prezidentimiz Heydər Əliyevin şəxsiyyəti və səhhəti ilə bağlı yaydıqları böhtan və iftiralar əhali tərəfindən qəzəblə qarşılanmışdır. Bununla əlaqədar rayonun bütün idarə və müəssisələrində, kənd və qəsəbələrində keçirilən yığıncaqlarda şamaxılılar Azərbaycan Prezidenti, xalqımızın xilaskarı və müstəqil dövlətimizin banisi Heydər Əliyevin əvəzolunmaz və titanik fəaliyyətini yüksək qiymətləndirir, məkrli qüvvələrin mətbuat səhifələrinə çıxardıqları səviyyəsiz, mənəviyyatdan uzaq, bütün insanlıq sərhədini aşan yazılarına son qoyulmasını tələb edirlər. Biz bir daha şamaxılıların bu arzusunu ifadə edərək, dövlətimizin əlaqədar orqanlarına, xüsusilə Azərbaycan Respublikasının Ədliyyə Nazirliyinə və Mətbuat Şurasına müraciət edirik. Ölkəmizdə min bir əziyyətlə bərqərar edilmiş siyasi sabitlikdən, söz və mətbuat azadlığından sui-istifadə edərək Azərbaycanın dövlət başçısı haqqında cürbəcür iftira və böhtanlar yayan qəzetlər və şəxslər haqqında Azərbaycan Respublikası Konstitusiyasının, Cinayət Məcəlləsinin müvafiq maddələrini, ən əsası adi etik qaydaları pozduqlarına görə qanuni tədbirlər görülməsini təmin etsinlər.
Biz belə hesab edirik ki, hər kəs öz əməllərinə görə məsuliyyət daşımalıdır. Dağıdıcı müxalifət qüvvələri birbaşa dövlətçiliyimizə qarşı yönəltdikləri bu çirkin kampaniya ilə əslində respublikamızda sabitliyi pozmağa, seçkilərin normal gedişinə maneçilik törətməyə, xaos və anarxiya yaratmağa çalışırlar. Amma yanılırlar. Onlar Heydər Əliyev kimi müdrik və uzaqgörən rəhbəri olan xalqı bir daha aldatmağa müyəssər ola bilməyəcəklər.
15 oktyabr prezident seçkilərinə hələ xeyli vaxt qalmasına baxmayaraq, bütün xalqımız kimi, daim respublikamızın müdrik başçısının qayğı və diqqətini hiss edən şamaxılılar da artıq seçimlərini çoxdan etmişlər. Onlar xalqımızın böyük və şanlı oğlu, ümummilli liderimiz Heydər Əliyevə - müstəqil Azərbaycan Respublikasının xoşbəxt və firavan gələcəyinə səs verəcəklər.
Şamaxı rayon ictimaiyyəti nümayəndələrinin adından:
Bəxtiyar Abbasov Viktor Əliyev
Əlihəsən Hüseynov Mayıl Alcanov
Rauf Əliyev Aydın Alcanov və başqaları.
Bölmənin digər xəbərləri
