MƏDƏNİYYƏT
XANƏGAH MEMARLIQ ABİDƏSİNƏ YENİ HƏYAT VERİLİR
Naxçıvanda 450-dən çox qədim tarixi abidə vardır. Onlardan biri də XII-XIII əsr memarlıq incisi olan Xanəgah kompleksidir. Hazırda Xanəgahın yalnız iki binası qalsa da, onun ətrafındakı xarabalıq, xüsusən də dağılmış bir binanın sütunları Əlincəçay Xanəgahının geniş kompleksdən ibarət olduğunu təsdiqləyir. Mənbələrdən alınmış rəsmi məlumatlara görə, Nəsiminin müəllimi Fəzlullah Nəimi Əlincəçay Xanəgahında dəfn edilmişdir.
Daşdan hörülmüş kompleksin qalıqları arasında türbə və məscid binaları müəyyən qədər mühafizə olunsa da, son dövrlər bu tikililərdə qəza vəziyyəti yaranmışdır.
Muxtar Respublika Ali Məclisi sədrinin tapşırığı ilə kompleksdə bərpa işlərinin baş planı və layihə-smeta sənədləri hazırlanmışdır.
Avqust ayının ilk günlərindən Xanəgah kompleksində bərpa işlərinə başlanmışdır. Bərpa zamanı nisbətən salamat qalmış binaların orijinal üslubu saxlanılmaqla, turistlər üçün müasir konstruksiyalardan istirahət yeri quraşdırılacaq, batmaqda olan çeşmədə təmir işləri aparılacaq və digər tədbirlər həyata keçiriləcəkdir.