XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Mayın 7-də Azərbaycan Respublikasının xarici işlər naziri Vilayət Quliyev NATO Baş katibinin Elm və ətraf mühit məsələləri üzrə müavini, NATO Elm Komitəsinin sədri Jan Fürneni qəbul etmişdir.
Qonağı salamlayan nazir Vilayət Quliyev Azərbaycanın Şimali Atlantika İttifaqı ilə “Sülh naminə tərəfdaşlıq” proqramı çərçivəsində bütün istiqamətlərdə, o cümlədən elmi-tədqiqat və ekologiya sahəsində əməkdaşlığın daha da inkişaf etdirilməsinə böyük əhəmiyyət verdiyini vurğulamışdır.
Görüş zamanı Vilayət Quliyev NATO-ya üzv və tərəfdaş dövlətlərin nümayəndələrinin iştirakı ilə NATO Elm Komitəsi nəzdində fəaliyyət göstərən Müasir Cəmiyyətin Problemləri üzrə Komitəsi ilə Azərbaycan Respublikası Ekologiya və Təbii Sərvətlər Nazirliyinin Bakıda keçirdiyi “Xəzər dənizinin ekoloji problemləri” adlı seminarı Xəzər dənizinin mövcud ekoloji problemlərinin aradan qaldırılması istiqamətində görülən işlərin müsbət addımı kimi dəyərləndirmişdir.
NATO Elm Komitəsinin sədri Jan Fürne öz növbəsində səmimi qəbula görə təşəkkürünü bildirərək, Şimali Atlantika İttifaqının müxtəlif sahələrdə Azərbaycanla əməkdaşlığın genişlənməsinə xüsusi əhəmiyyət verdiyini vurğulamış və belə tədbirlərin keçirilməsinin zəruriliyini qeyd etmişdir.
Görüş zamanı qarşılıqlı maraq doğuran bir sıra məsələlər də müzakirə olunmuşdur.
Bölmənin digər xəbərləri
