XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
Azərbaycan Respublikası Xarici işlər nazirinin müavini X.Xələfovun başçılıq etdiyi nümayəndə heyəti bu il iyul ayının 29-30-da Tehranda keçirilmiş Xəzər dənizinin hüquqi statusu haqqında Konvensiyanın işlənilməsi üzrə Xəzəryanı dövlətlərin xarici işlər nazirlərinin müavinləri səviyyəsində Xüsusi İşçi Qrupunun 7-ci iclasının işində iştirak etmişdir. İclasın sonunda aşağıdakı rəsmi məlumat qəbul olunmuşdur:
“2002-ci il iyul ayının 29-30-da, 1381-ci ilin mordad ayının 7-8-də Tehranda Xəzər dənizinin hüquqi statusu haqqında Konvensiyanın işlənilməsi üzrə Xəzəryanı dövlətlərin xarici işlər nazirlərinin müavinləri səviyyəsində Xüsusi İşçi Qrupunun 7-ci iclası keçirilmişdir. İclasa İran İslam Respublikasının Xəzər məsələləri üzrə xüsusi nümayəndəsi Mehdi Səfəri sədrlik edirdi.
İclasın işində Azərbaycan Respublikasının, İİR-in, Qazaxıstan Respublikasının, Rusiya Federasiyası və Türkmənistanın da nümayəndələri iştirak etmişlər. İclası giriş sözü ilə İran İslam Respublikasının xarici işlər naziri K.Xərrazi açmışdır.
K.Xərrazi 2002-ci ilin aprelində Aşqabadda keçirilən Birinci Xəzər Sammitinin mühümlüyünü vurğulayaraq, Xəzəryanı ölkələrin dövlət başçılarının növbəti görüşünün Tehranda keçirilməsinə İran İslam Respublikasının hazır olduğunu bəyan etdi. Nümayəndə heyətlərinin başçıları Xəzər dənizinin hüquqi statusu üzrə öz dövlətlərinin mövqelərini açıqlayaraq Xüsusi İşçi Qrupu çərçivəsində Xəzər dənizinin hüquqi statusu haqqında Konvensiyanın konsensus əsasında işlənilməsi üzrə işin davam etdirilməsinin zəruriliyini qeyd etdilər. Xəzər dənizinin hüquqi statusu haqqında Konvensiya üzrə işi, Xüsusi İşçi Qrupunun Bakıda keçiriləcək növbəti iclasında davam etdirmək barədə razılıq əldə olundu”.
Əlavə olaraq qeyd etmək lazımdır ki, Xəzər dənizinin hüquqi statusunun ayrı-ayrı aspektləri üzrə müəyyən irəliləyiş əldə olunmuşdur ki, bunlar da Xəzər dənizinin hüquqi statusu haqqında Konvensiyanın işlənilməsi prosesində öz əksini tapacaqdır.
Azərbaycan tərəfi növbəti görüşün sahibi kimi Konvensiya üzrə Xəzəryanı dövlətlərin təqdim edəcəyi təklifləri ümumiləşdirərək, Xüsusi İşçi Qrupunun Bakıda keçiriləcək növbəti iclasına təqdim edəcəkdir.
Bölmənin digər xəbərləri
