XƏZƏR DƏNİZİNİN HÜQUQİ STATUSUNUN MÜƏYYƏNLƏŞDİRİLMƏSİNDƏ İRƏLİLƏYİŞ VARDIR
AZƏRTAC-ın xüsusi müxbiri xəbər verir ki, Xəzər dənizi üzrə xüsusi işçi qrupunun aprelin 15-16-da Tehranda keçirilmiş 22-ci iclasında bu su hövzəsinin hüquqi statusunun müəyyən olunmasında irəliləyiş əldə edilmişdir. Azərbaycan, Rusiya, İran, Qazaxıstan və Türkmənistan xarici işlər nazirlərinin müavinləri səviyyəsində keçirilən məsləhətləşmələr Xəzər dənizinin hüquqi statusu haqqında Konvensiya layihəsinin redaktəsinə həsr edilmişdi. Konvensiyanın mətninə müəyyən düzəlişlər edilmişdir. Bundan əlavə, ötən ilin oktyabrında Tehranda keçirilmiş Xəzəryanı dövlətlərin 2-ci zirvə görüşünün qərarlarının gerçəkləşdirilməsi məsələləri müzakirə olunmuşdur.
Lakin Xəzərin dibinin bölünməsi məsələsi hələ də həll edilməmiş qalır. Hazırda Rusiya, Qazaxıstan və Azərbaycan arasında bir sıra razılaşmalar əldə olunmuşdur. Xəzərin şimal hissəsinin dibinin bölünməsi razılaşdırılmışdır. Lakin məsələnin tam həlli üçün Xəzərin cənubunda - İran, Azərbaycan və Türkmənistan arasında razılıq əldə edilməlidir. Burada bəzi fikir ayrılıqları qalmaqdadır. Həmin problemlərin ikitərəfli, yaxud üçtərəfli formatda həll olunacağı gözlənilir.
Bölmənin digər xəbərləri
