CƏMİYYƏT
YAP Nizami rayon təşkilatı Gənclər Birliyinin IV hesabat-seçki konfransı keçirilib
Bakı, 23 fevral, AZƏRTAC
Yeni Azərbaycan Partiyası (YAP) Nizami rayon təşkilatı Gənclər Birliyinin IV hesabat-seçki konfransı keçirilib.
Təşkilatdan AZƏRTAC-a bildiriblər ki, Azərbaycanın dövlət himni səsləndirildikdən sonra çıxış edən YAP Nizami rayon təşkilatının sədri, Milli Məclisin deputatı Sədaqət Vəliyeva konfransın gündəliyi haqqında məlumat verib. Bildirib ki, hazırda YAP Nizami rayon təşkilatının 11253 nəfər üzvü var. Onlardan 5511 nəfərini gənclər, 5293 nəfərini isə qadınlar təşkil edir. Rayon təşkilatının 149 ərazi ilk partiya təşkilatı fəaliyyət göstərir.
Qeyd olunub ki, 1993-cü ildə yaradılmış Nizami rayon təşkilatı mühüm inkişaf yolu keçib, üzvlərinin və ərazi təşkilatlarının sayı əhəmiyyətli dərəcədə artıb. Nizami rayonunda əhalinin YAP-a axını, ilk ərazi partiya təşkilatlarının yaradılması ulu öndər Heydər Əliyevin əsasını qoyduğu siyasi kursa və onun layiqli davamçısı Prezident İlham Əliyevə inamdan irəli gəlir.
YAP Nizami rayon təşkilatı Gənclər Birliyinin III konfransdan ötən müddət ərzində görülmüş işlərə dair hesabatı təqdim edən birliyin sədri, YAP Gənclər Birliyi ofisinin rəhbəri Əli Pənahov qeyd edib ki, III konfransda birliyin üzvlərinin sayı 4256 nəfər idisə, hazırda bu rəqəm 5511-dir. Gənclər Birliyinin üzvlərinin 2357 nəfərini qadınlar təşkil edir. Gənc üzvlərin 3061 nəfəri ali, 1470 nəfəri orta ixtisas, 980 nəfəri orta təhsillidir, 3 nəfəri isə fəlsəfə doktorudur. Gənclərin 2042 nəfəri təhsil, 1573 nəfəri səhiyyə, 324 nəfəri idarəetmə sahəsində, qalan üzvlər isə digər idarə və müəssisələrdə çalışır. Onların 378 nəfəri tələbədir. Üzv gənclərin 3-ü Avropa çempionu, 2-si dünya çempionu, 1-i paralimpiya medalçısı, 28-i respublika çempionu, 6-sı idman ustası, 2-si Prezident mükafatçısıdır. On iki gənc ötən il keçirilən bələdiyyə seçkilərində seçicilərin etimadını qazanaraq bələdiyyə üzvü seçilib. Hesabat dövründə YAP Nizami rayon təşkilatı Gənclər Birliyinin sıralarına 1255 nəfər qəbul olunub.
Qeyd edilib ki, YAP Nizami rayon təşkilatı Gənclər Birliyinin təşkilatçılığı ilə gənclərin maarifləndirilməsi, yaradıcı və intellektual bacarıqlarının artırılması, sağlam yetişməsi, dövlətçilik ideyalarına sadiqlik və hərbi-vətənpərvərlik ruhunda tərbiyə olunması, bütövlükdə rayonun və respublikanın ictimai-siyasi və sosial-mədəni həyatı ilə bağlı müxtəlif istiqamətlərdə tədbirlər həyata keçirib.
Sonra hesabat ətrafında çıxışlar olub.
YAP Nizami rayon təşkilatı Gənclər Birliyinin üzvləri Elşən Mirzəyev, Asif Əliyev, Ayan Yusifova və başqaları III konfransdan ötən müddət ərzində görülmüş işlərə dair hesabatı qənaətbəxş hesab ediblər və gənclərin fəaliyyətini yüksək qiymətləndiriblər.
Sonra təşkilati işlərə baxılıb. YAP Nizami rayon təşkilatı Gənclər Birliyinin Şura üzvləri, İdarə Heyəti və YAP Gənclər Birliyinin növbəti konfransına nümayəndələr seçilib.
Konfrans iştirakçılarının yekdil səsverməsinə əsasən Sevinc Abdullayeva YAP Nizami rayon təşkilatı Gənclər Birliyinin sədri, Ramil Vəlibəyov sədrin birinci müavini, Xəyal Əhmədov və Həbib Nəsirov isə müavinləri seçiliblər.
Təşkilati məsələlərdən sonra çıxış edən YAP Nizami rayon təşkilatı Gənclər Birliyinin sədri Sevinc Abdullayeva göstərilən etimada görə partiya rəhbərliyinə minnətdarlığını bildirib. Qeyd edib ki, YAP Nizami rayon təşkilatı Gənclər Birliyi bundan sonra da rayonun və respublikanın ictimai-siyasi, sosial-mədəni həyatında fəal olacaq, veriləcək tapşırıqları vaxtında və səmərəli şəkildə yerinə yetirəcək.
Milli Məclis sədrinin birinci müavini, YAP Siyasi Şurasının üzvü Ziyafət Əsgərov deyib ki, gənclərimiz ölkəmizi beynəlxalq aləmdə layiqincə təmsil edir, Azərbaycanla bağlı həqiqətlərin dünya ictimaiyyətinə çatdırılmasında, mədəni-mənəvi irsimizin təbliğ olunmasında fəallıq nümayiş etdirirlər. Bütün bunlar gəncliyimiz üçün dövlət tərəfindən yaradılmış əlverişli imkanlar, verilmiş mükəmməl təhsil və özünü təsdiqləmək üçün ideal məkan əsasında ərsəyə gəlib. Müasir Azərbaycan gəncləri unutmurlar ki, onlar müstəqil dövlətin azad gəncləri olaraq bugünkü uğurlara əsası ümummilli lider Heydər Əliyev tərəfindən qoyulmuş və hazırda Prezident İlham Əliyevin davam etdirdiyi siyasi kurs nəticəsində nail olublar.
YAP icra katibinin müavini, Milli Məclisin deputatı Siyavuş Novruzov hazırda partiyanın sıralarında 650 minə yaxın üzvün olduğunu bildirib və qeyd edib ki, onların arasında gənclər xüsusilə fərqlənirlər. Qeyd edilib ki, Yeni Azərbaycan Partiyası Azərbaycan siyasi palitrasında milli siyasi iradəni təmsil edən avanqard siyasi qüvvədir və partiyanın fəaliyyəti xalqımızın ali mənafeyinin ifadəsi kimi çıxış edir. Bu gün Prezident İlham Əliyevin sədri olduğu YAP-ın nüfuzu getdikcə artmaqdadır. Partiyanın cəmiyyətin inkişafına yönəlmiş çoxsaylı sosial layihələr reallaşdırması, gəncləri dövlətçilik və milli maraqlar ətrafında sıx birləşdirməsi onun tərəfdarlarının sayının artmasına səbəb olub. Ümummilli lider Heydər Əliyevin əsasını qoyduğu inkişaf strategiyasının Prezident İlham Əliyev tərəfindən uğurla davam etdirilməsi nəticəsində Azərbaycan Cənubi Qafqazın lider dövlətinə çevrilib.
YAP Siyasi Şurasının üzvü, Nizami Rayon İcra Hakimiyyətinin başçısı Tahir Budaqov deyib ki, Azərbaycan gəncliyi ölkənin ictimai-siyasi, sosial-iqtisadi və digər sahələrində aktiv fəaliyyət göstərir, intellektual imkanları və yaradıcılığı ilə dövlətçiliyimizin möhkəmləndirilməsi işinə öz töhfəsini verirlər.
T.Budaqov bildirib ki, Azərbaycan dövləti gənclərə üstünlük verməklə bərabər öz siyasətini gənclərin bilavasitə iştirakı ilə formalaşdırıb həyata keçirir. Bu, onu göstərir ki, Azərbaycan dövləti gənc nəslə həm etibar edir, onun qayğıları ilə məşğul olur, həm də gənclərin ideyalarını, təkliflərini bilavasitə özlərindən alaraq həyata keçirir. Prezident İlham Əliyevin müvafiq Sərəncamı ilə təsdiqlənmiş 2015-2025-ci illərdə Azərbaycan gənclərinin İnkişaf Strategiyasının qəbul edilməsi məhz bu siyasətin bariz nümunəsidir.
Digər çıxış edənlər də Yeni Azərbaycan Partiyasının sədri, Prezident İlham Əliyevin gənclərə göstərdiyi diqqət və qayğıdan bəhs ediblər. Onlar YAP-ın gənclərin fəaliyyəti və inkişafı üçün hərtərəfli şərait yaratdığını bildiriblər.