“Yomiuri” qəzeti: ABŞ Yaponiyada yeni raketdənmüdafiə radiolokasiya stansiyası yerləşdirməyi planlaşdırır
Tokio, 30 yanvar, AZƏRTAC
ABŞ ərazisinin qitələrarası ballistik raketlərdən müdafiə sisteminin möhkəmləndirilməsi çərçivəsində 2025-ci ilədək Yaponiyada yeni yerüstü radiolokasiya stansiyası (RLS) yerləşdirməyi planlaşdırır.
AZƏRTAC xəbər verir ki, bu barədə “Yomiuri” qəzeti məlumat yayıb. Daha geniş ərazini əhatə etmək üçün eyni radar stansiyasından 2023-cü ildə Havay adalarında yerləşdirilməsi də nəzərdə tutulur. Qeyd edilir ki, bu izləmə sistemi buraxılan qitələrarası raketin start yerini, uçuş trayektoriyasını və digər məlumatları Kaliforniya və Alyaska ştatlarında yerləşən raketdənmüdafiə sistemlərinə ötürəcək.
ABŞ yeni RLS-ni Koreya yarımadasına yaxın məsafədə yerləşdirməklə ilk növbədə Şimali Koreya tərəfindən raket hücumunun qarşısını almaq istəyir. Asiya-Sakit okean regionunda müşahidə sisteminin gücləndirilməsi barədə müvafiq bənd ABŞ raketdənmüdafiə sisteminin gələcək inkişafına dair yeni strategiyada da öz əksini tapıb.
Nəşrin bildirdiyinə görə, belə güclü radar ətraf mühitə çox ciddi təsir göstərə bilər və buna görə də Vaşinqton Yaponiyanın yerli hakimiyyət orqanları tərəfindən ciddi tənqidlə qarşılaşacaq. Bundan əlavə, Yaponiya hökuməti 2023-cü ildə Yamaquçi və Akita prefekturalarında ABŞ-ın iki “Aegis Ashore” yerüstü raketdən müdafiə kompleksini yerləşdirmək niyyətindədir. Bu da prefekturaların administrasiyası tərəfindən mənfi reaksiya doğurub.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
