ZAMAN YEREVANIN ƏLEYHİNƏ İŞLƏYİR...
A.Melikişvili Gürcüstanda və ümumən Cənubi Qafqaz regionunda indiki vəziyyət haqqında Vardanyanın “qərəzli və fitnəkar iddiaları”nı kifayət qədər inandırıcı şəkildə təkzib edərək, Gürcüstandakı bəzi erməni kilsələri, gürcü şərablarının Rusiyaya ixracının qadağan olunması barəsində mübahisəyə dair cəfəng uydurmaların əsassızlığını konkret faktlarla sübuta yetirir.
Müəllifin fikrincə, Vardanyanın Ermənistanda və Gürcüstanda iqtisadi vəziyyətə dair gətirdiyi müqayisə də aşkar surətdə obyektivlikdən uzaqdır. O vurğulayır ki, əgər Ermənistan əhalisinin, demək olar, yarısının iqtisadi fəaliyyət üçün ən adi imkanın yoxluğu üzündən ölkədən baş alıb getdiyi nəzərə alınarsa, onda burada iqtisadi vəziyyətin yaxşılaşdığı barədə fikir çox da inandırıcı görünmür. Bundan başqa, heç kimə sirr deyil ki, hər il Ermənistan xəzinəsi ABŞ-ın xeyli maliyyə yardımı və çoxsaylı erməni diasporunun səxavətlə verdiyi ianələr hesabına dolur.
A.Melikişvili yazır ki, A.Vardanyanın məktubunda bir çox ermənilərin regionda ölkənin getdikcə təklənməsindən, - bu, onların öz fikridir, - dərin təşviş keçirməsi əksini tapmışdır. Bu təşviş ilk dəfə Bakı-Tbilisi-Ceyhan neft kəmərinin tikintisi başa çatdıqdan sonra özünü göstərmişdir. İndi Bakı-Tbilisi-Ərzurum qaz kəməri tikintisinin başa çatmasının yaxınlaşması və Qars-Axalkalaki-Tbilisi-Bakı dəmir yolunun inşasına dair planlar bu təşvişi daha da gücləndirir. Yerevan açıqca anlayır ki, formalaşmaqda olan Türkiyə-Azərbaycan-Gürcüstan triumviratı onu kənara doğru sıxışdırır. Ermənistanın milli təhlükəsizliyinin təminatçısı kimi Rusiyanın seçilməsi bir çox cəhətdən öncədən müəyyən edilib və məcburi xarakter daşıyır - xüsusən də Dağlıq Qarabağ üstündə Azərbaycanla hərbi əməliyyatlara yenidən başlanması ilə bağlı qorxuya və Ermənistanın öz nəhəng qonşusu Türkiyə ilə münasibətlərini pisləşdirmiş soyqırımı haqqında səngimək bilməyən xatirəyə görə.
Ermənistanın öz suverenliyinin əsas atributlarını Rusiyanın ixtiyarını verməsi faktı Yerevana gələn hər bir kəsə açıqca aydın olur: Zvartnots hava limanına gələnləri Rusiya sərhədçiləri qarşılayır. Bu bir yana, ölkənin Azərbaycan və Türkiyə ilə sərhədini Ermənistan-Rusiya birgə sərhədçi bölmələri qoruyurlar. Kədərli həqiqət ondadır ki, Rusiya qarşısında bu cür köləlik statusundan can qurtarmaq Ermənistan üçün çətin olacaqdır. Aktivlərin müqabilində borclar silindiyinə görə indi Rusiya ölkənin sənaye müəssisələrinin böyük əksəriyyətinə və elekrik enerjisi obyektlərinin təxminən 70 faizinə nəzarət edir.
A.Melikişvili daha sonra erməniləri nəzərdə tutaraq deyir: Onlara məsləhət görmək istəmədiyim dəqiq bir şey varsa, o da budur ki, Gürcüstanın Cavaxeti bölgəsində separatçılıq əhval-ruhiyyəsini qızışdırmasınlar. Bu, son dərəcə əks-səmərəli olar və Yerevana nə ilə nəticələnəcəyi öncədən bəlli olmayan tutarlı zərbə endirə bilər. Eyni zamanda, Dağlıq Qarabağa dair danışıqlarda tərəqqinin olmaması ilə əlaqədar artıq Bakının səbir kasası daşır. Bu narazılığın güclənməsi ölkənin neft gəlirlərinin artması fonunda baş verir və nəticədə səbirli olmaq və erməni qoşunlarının işğal etdiyi öz doğma Azərbaycan ərazilərini qaytarmaq həvəsindən qaçmaq Azərbaycan rəhbərliyi üçün getdikcə çətin olur.
Didaktik məşqlər və demaqoqcasına bəyanatlar vermək Vardanyanı indi Ermənistan qarşısında duran ən mühüm problemdən - Dağlıq Qarabağ münaqişəsinin həlli problemindən yayındırmışdır. Onun həlli regionda təhlükəsizliyin və sabitliyin təmin edilməsinə əhəmiyyətli töhfə verər və Qafqazda “ayırıcı xətlər”in meydana gəlməsinin qarşısını faktik olaraq alardı. A.Melikişvili bu barədə danşarkən xatırladır ki, “gələn il ümumi daxili məhsulun həcminə görə Azərbaycan Ermənistanı yeddi dəfə geridə qoyacaqdır. C-b Vardanyana Ermənistan üçün bu cür iqtisadi qeyri-bərabərliyin nəticələri barədə lazımınca düşünməyi təkidlə məsləhət görürəm. Zaman Yerevanın əleyhinə işləyir, buna görə də o, Qarabağ münaqişəsinin həlli ilə nə qədər tez ciddi məşğul olmağa başlasa, bir o qədər yaxşı olar”.
Bölmənin digər xəbərləri
