ZAQATALADA KƏND TƏSƏRRÜFATI MƏHSULLARI İSTEHSALI 13,4 FAİZ ARTMIŞDIR
Zaqatala Rayon İcra Hakimiyyətindən AZƏRTAC-ın müxbirinə bildirmişlər ki, 2008-ci ilin birinci rübündə rayonda keçən ilin eyni dövrü ilə müqayisədə 13,4 faiz çox, yəni 6 milyon 742 min manatlıq kənd təsərrüfatı məhsulu istehsal olunmuşdur. İlin ilk rübündə rayonda 1245 ton ət, 7053 ton süd, 2 milyon 655 min ədəd yumurta istehsal olunmuşdur ki, bu da ötən ilin müvafiq dövrünə nisbətən xeyli çoxdur. Əvvəlki illə müqayisədə qaramalın sayı 952 baş artaraq 59 min 282 başa, qoyun-keçilərin sayı isə 527 baş artaraq 160 min 405 başa çatmışdır.
Ötən il rayonda cari ilin məhsulu üçün 8350 hektar sahədə payızlıq taxıl əkilmişdir. Əkin sahələrinin 5801 hektarını buğda əkinləri təşkil edir ki, bu da əvvəlki illə müqayisədə 2,2 dəfə çoxdur. Hazırda taxıl əkinlərinə aqrotexniki qulluq tədbirləri davam etdirilir.
Bölmənin digər xəbərləri
